პირს, რომელიც TV პირველის ოპერატორს მანქანით განზრახ დაეჯახა, პროკურატურამ ბრალი წარუდგინა.

უწყება აცხადებს, რომ რ.ა.-მ ჟურნალისტებს ძალადობის მუქარით მოსთხოვა, შეეჩერებინათ გადაღება, თუმცა მათ პროფესიული საქმიანობა გააგრძელეს.

"ბრალდებული ჟურნალისტურ საქმიანობაში ხელის შეშლის მიზნით, ავტომანქანით განზრახ დაეჯახა TV პირველის ოპერატორ ლ.ბ.-ს ფეხის არეში და დაუზიანა ვიდეოკამერის შტატივი, რითაც აიძულა შეეწყვიტა პროფესიული საქმიანობა", — აცხადებენ პროკურატურაში.

რ.ა.-ს ბრალი საქართველოს სისხლის სამართლის კოდექსის 154-ე მუხლის მე-2 ნაწილით, 126-ე და 187-ე მუხლის 1-ლი ნაწილით წარედგინა, რაც ჟურნალისტისათვის პროფესიულ საქმიანობაში უკანონოდ ხელის შეშლას, ძალადობას და სხვისი ნივთის დაზიანებას გულისხმობს. ეს მუხლები სასჯელის სახედ და ზომად 1-დან 3 წლამდე თავისუფლების აღკვეთას ითვალისწინებს.

7 სექტემბერს, ფონიჭალაში ნარკორეალიზატორების დაკავებასთან დაკავშირებული საკითხების გაშუქების დროს ჟურნალისტებს მანქანა დააჯახეს. აღნიშნულის ამსახველი კადრები ტელევიზიებმა გაავრცელეს, სადაც ჩანს, რომ მედიის წარმომადგენლები საკუთარ სამსახურებრივ მოვალეობას ასრულებენ, რა დროსაც ადგილზე მყოფი მანქანა მათი მიმართულებით იძვრის და ერთ-ერთ ოპერატორს ეჯახება.