საქართველოს სახალხო დამცველი, უჩა ნანუაშვილი მიიჩნევს, რომ ბათუმში "ძალადობრივ ფაქტებზე" სამართალდამცავების რეაგირება დაგვიანებული იყო. ამის შესახებ ნანუაშვილმა რუსთავი 2-ის ეთერში განაცხადა.

„ჩვენ ვნახეთ კარგად, რომ პოლიციის რეაგირება ამ ძალადობრივ ფაქტებზე იყო დაგვიანებული. საათების განმავლობაში საზოგადოებას ჰქონდა განცდა, რომ ისინი იყვნენ უსუსურები, მათ არ ჰქონდათ დაცულობის განცდა, რომელიც სწორედ ასეთი შემთხვევების დროს სამართალდამცავმა ორგანოებმა უნდა შექმნან და ჩვენ ეს აშკარად დავინახეთ,“ - განაცხადა უჩა ნანუაშვილმა.

მისი თქმით, გამოძიებამ უნდა გასცეს პასუხი იყო თუ არა შუღლის გაღვივების მოტივით მოწოდებები და იყო თუ არა სპონტანური აქცია.

„დავინახეთ, რომ ზოგადად პრევენცია ასეთი ძალადობის ქვეყანაში ვერ ხდება და ჩვენ მივიღეთ, რომ გარკვეული ინსტიტუტები ვერ მუშაობდნენ ეფექტურად... ამიტომაც მივიღეთ ჩვენ ასეთი კრიზისული სიტუაცია,“ - განაცხადა სახალხო დამცველმა.

ბათუმში 11 მარტს პატრულმა მოძრაობის შეფერხებისა და არასწორი პარკირებისთვის მოქალაქე დააჯარიმა, რასაც ჯერ სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა. აღნიშნული აქცია არეულობაში გადაიზარდა, რა დროსაც აქციის მონაწილეებმა დაწვეს და დააზიანეს როგორც ავტომობილები, ისე საგზაო ინფრასტრუქტურა.