ნაციონალური მოძრაობა მიშელის შეთანხმებას შეუერთდა. დოკუმენტზე ხელმოსაწერად ევროკავშირის წარმომადგენლობის ოფისში პარტიის თავმჯდომარე, ნიკა მელია და სხვა ლიდერები მივიდნენ.

ხელმოწერის შემდეგ ნიკა მელიამ განაცხადა, რომ ამ ნაბიჯით მართ ქართული ოცნება შებოჭეს და არ მისცემენ საშუალებას გავიდნენ დასავლური სივრციდან.

"სანამ ისინი წარმოადგენენ ოფიციალურ პირებს და წარმოადგენენ სახელმწიფოს, ჩვენ არ უნდა მივცეთ ჩვენს დასავლელ პარტნიორებს, სტრატეგიულ მეგობრებს, იმის შესაძლებლობა, რომ ჩვენს ქვეყანაში და ქართველ ხალხს, იმის გამო რომ არასაიმედო ხელისუფლება გვყავს ზურგი აქციონ. ამისათვის ჩვენ მივიღეთ ეს გადაწყვეტილება, მიუხედავად აზრთა სხვადასხვაობისა, რომელიც ცნობილი იყო გარკვეულ დებულებებთან მიმართებაში, რაც გაწერილი იყო 19 აპრილის შეთანხმებაში, მაგრამ ეს ყველაფერი დღეს არის მე-100 და ალბათ მე-200 ხარისხოვანიც კი", — განაცხადა მელიამ დოკუმენტზე ხელმოწერის შემდეგ.

მელიას თქმით, ბოლო პერიოდში ქართული ოცნების ლიდერების განცხადებები ღიად ანტისახელმწიფოებრივ განცხადებებს აკეთებენ, რაც მისივე შეფასებით, ქვეყნის საგარეო კურსის ცვლილების მცდელობაზე მიუთითებს.

"წარმოიდგინეთ ყოფნით კადნიერება ქართულ ოცნებაში მაღალი თანამდებობის პირებს, და საუბრობენ, რომ ევროკავშირს სურს თურმე სახელოვანი ქართული სასამართლო სისტემის და შესაბამისად ისინი არ თვლიან საჭიროდ მიიღონ ამ მიმართულებით დახმარება ჩვენი პარტნიორებისგან. ისინი არ ერიდებიან მაგალითად ჩვენი ერთ-ერთი ყველაზე მჭიდრო სტრატეგიული პარტნიორის ესტონეთის გაკრიტიკებას და მოუწოდებენ ესტონეთს, როგორც სახელმწიფოს, რომ მიხედონ საკუთარ თავს. ისინი აკრიტიკებენ ყველა პრაქტიკულად ევროპარლამენტარს და ეუბნებიან რომ თქვენ არ ხართ ჩვენი უფროსები", — აცხადებს მელია.

გუშინ, 1-ელ სექტემბერს ნიკა მელიამ სპეციალური ბრიფინგი გამართა და განაცხადა, რომ პარტია შარლ მიშელის დოკუმენტს ხელს მოაწერს. მისივე თქმით, ევროკავშირის მაკროფინანსური დახმარებაზე უარის თქმა და ქართული ოცნების ბოლო განცხადებები არის ღია პოლიტიკური განაცხადი საგარეო პოლიტიკური კურსის ცვლილებაზე და სწორედ ეს გახდა მათთვის ბიძგი, რომ შეთანხმებისთვის ხელი მოეწერათ.