ცენტრალური საარჩევნო კომისიის ინფორმაციით, 2 ოქტომბრის მუნიციპალურ არჩევნებზე ხმის დათვლის პროცესის გამჭვირვალობის უზრუნველყოფის მიზნით, საარჩევნო პროცესში უმაღლესი სასწავლებლების სტუდენტები ჩაერთვებიან. ცესკოში ამბობენ, რომ შესაბამისი მემორანდუმი უნივერსიტეტებთან დღეს, პირველ სექტემბერს გააფორმეს.

კომისიის ცნობით, უნივერსიტეტები იღებენ ვალდებულებას, რომ ცესკოს მიაწოდებენ ინფორმაციას იმ სტუდენტებისა თუ კურსდამთავრებულების შესახებ, რომლებსაც აქვთ ხმის დათვლის პროცესის ამსახველი ვიდეოს ინტერნეტში განთავსების კვალიფიკაცია. დაგეგმილია ერთობლივი ტრენინგები და სამუშაო შეხვედრებიც.

არჩევნების დღეს ხმის დათვლის პროცესის ვიდეოგადაღების საკითხი დღის წესრიგში საარჩევნო რეფორმის განხორციელების შემდგომ დადგა. ცესკოს ინფორმაციით, გადაღებული ვიდეომასალა ონლაინ პლატფორმაზე განთავსდება. სწორედ ამ პროცესის ტექნიკურად განხორციელებაში იქნებიან ჩართული თბილისის სახელმწიფო უნივერსიტეტის და სოხუმის სახელმწიფო უნივერსიტეტის სტუდენტები.