"თქვენი საქმე ჯერ არ დაგვიმთავრებია", — ასე მიმართა აშშ-ის პრეზიდენტმა, ჯო ბაიდენმა ისლამური სახელმწიფოს მებრძოლებს, რომლებმაც ქაბულის აეროპორტში ტერაქტი მოაწყვეს. აფეთქების შედეგად დაიღუპა 170 ადამიანი, მათ შორის 13 აშშ-ის ჯარისკაცი.

ბაიდენმა და სამხედროების გაყვანისა ავღანეთის კონფლიქტის შესახებ მორიგი განმარტებები გაავრცელა და აღნიშნა, მიუხედავად იმისა, რომ ავღანეთის უსაფრთხოების ძალები იმაზე სწრაფად დაიშალა, ვიდრე მოსალოდნელი იყო, აშშ მზად იყო ამ სცენარისთვისაც.

"მე უარს ვამბობ ომის გაგრძელებაზე, რომელიც აღარ ემსახურებოდა ჩვენი ხალხის სასიცოცხლო ეროვნულ ინტერესებს", — განაცხადა მან.

ის ავღანეთში დარჩენილ ამერიკელებს, სურვილის შემთხვევაში ამერიკაში დაბრუნებას პირდება. ბაიდენმა თქვა ისიც, რომ ევაკუაციის ოპერაცია წარმატებით განხორციელდა.

2021 წლის 14 აპრილს აშშ-ის პრეზიდენტმა ავღანეთიდან ამერიკული ჯარების გაყვანის შესახებ განაცხადა, რომ გაყვანა 1-ელ მაისს დაიწყებოდა და 31 აგვისტომდე დასრულდებოდა. ავღანეთიდან აშშ-ის ძალების გასვლის შემდეგ, თალიბანმა მალევე შეძლო და ქაბულიც აიღო – პრეზიდენტი გაიქცა, თალიბებმა ძალაუფლება მოიპოვეს.

მათ ხელისუფლების ყველა წარმომადგენლისათვის საყოველთაო "ამნისტია გამოაცხადეს" და მთავრობაში ქალები მიიწვიეს. მათი მტკიცებით, ხალხს შეუძლია, დაუბრუნდეს თავის რუტინულ ყოველდღიურობას, თუმცა ამის ფონზე, დევნიან მოქალაქეებს, ქალებს, რომლის ჩაცმის სტილიც არ მოსწონთ, ჟურნალისტებს. ძალაუფლების მიღების შემდეგ თალიბებმა არაერთი ადამიანი მოკლეს და დაჭრეს, მათ შორის, ისინი, ვინც ქვეყნიდან გაქცევას ცდილობდნენ.

ავღანეთის ხელისუფლების ნაწილი, რომელსაც სათავეში ვიცე-პრეზიდენტი ამრულაჰ სალეჰი უდგას, დანებებას არ აპირებს. ის სამხედრო მეთაურ აჰმად მასუდთან ერთად მომხრეებს პანჯშირის ხეობაში კრებს.

31 აგვისტოს ოფიციალურად დასრულდა ევაკუაციის პროცესი და 20-წლიანი ომის შემდეგ ავღანეთი უკანასკნელმა ამერიკელმა სამხედრომაც დატოა. ქაბულის აეროპორტს ახლა თალიბები აკონტროლებენ.