აშშ-ს პრეზიდენტის, ჯო ბაიდენის განცხადებით, ქაბულში მომხდარ აფეთქებას ორგანიზატორებს არ აპატიებენ და ამაზე მათ პასუხს აგებინებენ. ამის შესახებ მან სპეციალურ ბრიფინგზე ისაუბრა.

"მათ, ვინც ეს თავდასხმა განახროციელეს და ვისაც ამერიკისთვის ზიანის მიყენება სურს, იცოდეთ, რომ ჩვენ არ გაპატიებთ, არ დავივიწყებთ, გიპოვით და პასუხს გაგებინებთ", — განაცხადა ბაიდენმა.

ბაიდენმა ისაუბრა იმაზეც, რომ მან უკვე გასცა ბრძანება, შეიმუშავონ შესაბამისი გეგმები ისლამური სახელმწიფოს ლიდერებზე, აქტივებსა და ობიექტებზე. მისი თქმით, თავდასხმას უპასუხებენ მათ შერჩეულ ადგილზე, მათი შერჩეული მეთოდით.

"ISIS-ის ტერორისტები ვერ მოიგებენ. ჩვენ გადავარჩენთ ამერიკელებს, გამოვიყვანთ ჩვენ ავღანელ მოკავშირეებს და ჩვენი მისია გაგრძელდება. ამერიკას ვერ დააშინებენ", — თქვა მან.

BBC-ის ინფორმაციით, ქაბულის აეროპორტთან მოხმდარ აფეთქებაზე პასუხისმგებლობა ისლამურმა სახელმწიფომ აიღო. მათი ცნობით, აღნიშნული განცხადება ტელეგრამზე გავრცელდა.

ქაბულში აფეთქების შედეგად, სულ მცირე, 60 ადამიანი დაიღუპა, ხოლო 140-ზე მეტი დაშავდა. პენტაგონის ბოლო ინფორმაციით, დაღუპულია 12 ამერიკელი სამხედრო მოსამსახურე, ხოლო დაშავებულია, სულ მცირე, 15. მათივე განცხადებით, 14 აგვისტოდან 104 000-ზე მეტი ადამიანის ევაკუაცია მოახერხეს, მათ შორის, 66 ათასზე მეტი აშშ-ს, ხოლო 37 ათასზე მეტი მათი მოკავშირეებისა და პარტნიორების დახმარებით. პენტაგონის ოფიციალური წარმომადგენლის განცხადებით, ავღანეთში ამ ეტაპზე, დაახლოებით, 1 000-მდე ამერიკელია დარჩენილი.

ქაბულის აეროპორტთან აფეთქება 26 აგვიტოს მაშინ მოხდა, როდესაც აეროპორტის შესასვლელთან ავღანელი მოქალაქეები იყვნენ შეკრებილნი, რომლებიც აეროპორტის შენობაში შესვლას ცდილობდნენ. აფეთქების შემდეგ, რამდენიმე ქვეყანამ ევაკუაციის დროებით შეჩერების გადაწყვეტილება მიიღო. პროცესს არ აჩერებს დიდი ბრიტანეთი და აშშ.

წაიკითხეთ ასევე: