ჯანდაცვის მინისტრის მოადგილის, თამარ გაბუნიას განცხადებით, პრეპარატი, ტოცილიზუმაბი მხოლოდ კლინიკებშია ხელმისაწვდომი და პაციენტის ოჯახებს მედიკამენტის შოვნა არ უნდა მოსთხოვონ. გაბუნიას თქმით, ქვეყანაში ერთადერთმა მომწოდებელმა განკუთვნილი ლიმიტი უკვე შემოიტანა. ამის შესახებ მან საკოორდინაციო საბჭოს წევრების ბრიფინგზე ისაუბრა.

"ტოცილიზუმაბი, ასევე, არცერთი მედიკამენტი არ უნდა იყიდოს ოჯახმა. არავითარი შავი ბაზარი ტოცილიზუმაბთან მიმართებაში არ არსებობს. ტოცილიზუმაბის ერთადერთი მომწოდებელი არის როშე, რომელმაც შემოიტანა ქვეყნისთვის განკუთვნილი ლიმიტი, რაც გადანაწილდა კლინიკებში. კლინიკების ნაწილს აქვს პრეპარატი, ხშირ შემთხვევაში ხდება ისე, რომ კლინიკიდან კლინიკაში ხდება მედიკამენტების გადანაწილება, როდესაც პაციენტის მდგომარეობა აუცილებლად საჭიროებს ტოცილიზუმაბით მკურნალობას.

დღევანდელი მდგომარეობით მედიკამენტი ქვეყანაში არის გარკვეულ კლინიკებში და ჩვენც ვცდილობთ, რომ როდესაც პაციენტისათვის აუცილებელია ტოცილიზუმაბის გადასხმა კლინიკებთან კომუნიკაციის გარკვეული ფასილიტაციაც გავაკეთოთ, რომ ვისაც სჭირდება მარტივად ისესხოს კლინიკამ მეორე კლინიკისგან. არ არაფრით არ უნდა ჩაერიოს პაციენტი და არც არანაირი თანხის მობილიზება არ არის საჭირო", — განაცხადა გაბუნიამ.

გაბუნიას განცხადებითვე, რამდენიმე მწარმოებელთან მიდის მუშაობა, რომ საქართველოში კორონავირუსის სამკურნალო ახალი პრეპარატი შემოიტანონ, თუმცა ჯანდაცვის მინისტრის მოადგილეს, კონკრეტული მედიკამენტები არ დაუსახელებია.

"ბოლო პერიოდში აქტუალურია მონოკლონური ანტისხეულების გამოყენების პრაქტიკა. FDA-მ, ასევე ევროპის მარეგულირებელმა მიანიჭა ავტორიზაცია რამდენიმე მწარმოებლის მონოკლონურ ანტისხეულებს. ჩვენ ვმუშაობთ მათთან იმისთვის, რომ მონოკლონური ანტისხეულების შემოტანა მოხდეს საქართველოში. აქ ჩვენება შედარებით მსუბუქი პაციენტებისთვის არის, ამბულატორიულ პირობებშიც კი იყენებენ ამ მედიკამენტებს და ვფიქრობთ, რომ მომდევნო ორი-სამი კვირის განმავლობაში გარკვეული პროგრესი ამ მიმართულებებით გვექნება. ძვირადღირებულია ეს მედიკამენტები, მაგრამ ვმუშაობთ, რომ შედარებით შეღავათიან ფასად ქვეყანაში შემოვიდეს", — განაცხადა მან.

წაიკითხეთ ასევე: