აშშ-ის სახელმწიფი მდივნის ენტონი ბლინკენის განცხადებით, მომავალში აშშ თალიბანთან მხოლოდ სახელმწიფო ინტერესებიდან გამომდინარე ითანამშრომლებს და იმის გათვალისწინებით, თუ რას აკეთებს ვალდებულებების შესასრულებლად. ინფორმაციას ამის შესახებ New York Times ავრცელებს.

"ჩვენ ბოლო რამდენიმე კვირის განმავლობაში ვთანამშრომლობდით თალიბანთან, რომ შესაძლებელი ყოფილიყო საევაკუაციო ოპერაციების ჩატარება.მომავალში თალიბანის მთავრობასთან ნებისმიერი თანამშრომლობა მხოლოდ ერთი რამით იქნება გამოწვეული — ჩვენი სასიცოცხლო მნიშვნელობის ინტერესები", — განაცხადა ენტონი ბლინკენმა.

ბლინკენმა აღნიშნა, რომ თალიბებთან თანამშრომლობა არ იქნება განპირობებული მათ მიმართ ნდობითა და რწმენით და ყოველი ნაბიჯი, რომელსაც აშშ გადადგამს, დაფუძნებული იქნება არა იმაზე, თუ რას ამბობს თალიბანი, არამედ იმაზე, თუ რას აკეთებს ის თავისი ვალდებულებების შესასრულებლად.

"თალიბანი ეძებს საერთაშორისო ლეგიტიმაციასა და მხარდაჭერას. ჩვენ მესიჯი არის ის, რომ მათ ის უნდა მოიპოვონ. თალიბანს შეუძლია ამის გაკეთება მოგზაურობის თავისუფლებაზე აღებული ვალდებულებების შესრულებით; ავღანელი ხალხის, მათ შორის, ქალებისა და უმცირესობების უფლებების დაცვით და ინკლუზიური მთავრობის შექმნით, რომელიც შეძლებს, დააკმაყოფილოს ავღანელი ხალხის მისწრაფებები და საჭიროებები", — განაცხადა ენტონი ბლინკენმა.

სახელმწიფო მდივნის თქმით, თუ თალიბანი შეძლებს მუშაობას ისე, რომ ეს ინტერესები დაცული იქნება, მათ შორის, აშშ-ის მოქალაქის, მარკ ფრერიქსის, უსაფრთხო დაბრუნება სამშობლოში, ქვეყანასა და რეგიონში სტაბილურობა იქნება და [თალიბანი] შეინარჩუნებს ბოლო 20 წლის მიღწევებს, იმუშავებენ თალიბანთან ერთად.

2021 წლის 14 აპრილს აშშ-ის პრეზიდენტმა ავღანეთიდან ამერიკული ჯარების გაყვანის შესახებ განაცხადა, რომ გაყვანა 1-ელ მაისს დაიწყებოდა და 31 აგვისტომდე დასრულდებოდა. ავღანეთიდან აშშ-ის ძალების გასვლის შემდეგ, თალიბანმა მალევე შეძლო და ქაბულიც აიღო – პრეზიდენტი გაიქცა, თალიბებმა ძალაუფლება მოიპოვეს.

მათ ხელისუფლების ყველა წარმომადგენლისათვის საყოველთაო "ამნისტია გამოაცხადეს" და მთავრობაში ქალები მიიწვიეს. მათი მტკიცებით, ხალხს შეუძლია, დაუბრუნდეს თავის რუტინულ ყოველდღიურობას, თუმცა ამის ფონზე, დევნიან ქუჩაში დამოუკიდებლობის დღის აღსანიშნავად გამოსულ მოქალაქეებს, ქალებს, რომლის ჩაცმის სტილიც არ მოსწონთ, ჟურნალისტებს. ბოლო დღებში თალიბებმა ათამდე მოკლეს და არაერთი დაჭრეს, მათ შორის, ისინი, ვინც ქვეყნიდან გაქცევას ცდილობდნენ.

ბოლო დღეებში ავღანეთში გარდაცვლილთა რაოდენობის შესახებ ზუსტი მონაცემები არ არსებობს და მედიაში სხვადასხვა მონაცემი ვრცელდება. ავღანეთის ხელისუფლების ნაწილი, რომელსაც სათავეში ვიცე-პრეზიდენტი ამრულაჰ სალეჰი უდგას, დანებებას არ აპირებს. ის სამხედრო მეთაურ აჰმად მასუდთან ერთად მომხრეებს პანჯშირის ხეობაში კრებს. ცოტა ხნის წინ ცნობილი გახდა, რომ თალიბანის ხელმძღვანელობამ ასობით მებრძოლი პანჯშირის ხეობის ასაღებად გაგზავნა. თუმცა, შედეგების შესახებ ჯერეჯრობით არაფერია ცნობილი.

საერთაშორისო საზოგადოებამ კი თალიბანისთვის ეკონომიკური სანქციების დაწესება დაიწყო. 26 აგვისტოს ქაბულის აეროპორტთან ორი აფეთქება მოხდა. ტერაქტზე პასუხისმგებლობა ISIS-ის ავღანურმა დანაყოფმა აიღო. ტერაქტს 170-ზე მეტი ადამიანის სიცოცხლე ემსხვერპლა, მათ შორის 13 ამერიკელი სამხედრო და თალიბანის 28 მებრძოლი იყო. აშშ და კოალიციის წევრი ქვეყნები აცხადებდნენ, რომ ისინი ევაკუაციას 31 აგვისტომდე არ შეწყვეტდნენ.