ელენე ხოშტარიას მოძრაობა დროას საქართველოს კლინიკების ასოციაციის პრეზიდენტი, ვილი პაჭკორია და საქართველოს დარგობრივ მეცნიერებათა აკადემიის აკადემიკოსი, გიორგი ჩახუნაშვილი შეუერთდნენ. ხოშტარიამ დღეს მათთან ერთად ბრიფინგი გამართა და ეპიდსიტუაციაზე ისაუბრა.

"ჩვენ უკვე რამდენიმე კვირაა ვმუშაობთ კონკრეტულ სტრატეგიაზე, იმ კონკრეტულ ინიციატივებზე, თუ რამ უნდა გამოგვიყვანოს ამ ჩიხური მდგომარებიდან და ეს ორი ადამიანი არის პროფესიონალი, არაპოპულისტი, არაპოლიტიზირებული, არა პერსონალ კეთილდღეობაზე ორიენტირებული, არამედ მათ გადადეს ეგოისტური ინტერესები და შემოუერთდნენ დროას იმისთვის, რომ ჩვენს თანამოქალაქეეს დაეხმარონ ამ საშინელ პანდემიასთან გამკლავებაში", — განაცხადა ხოშტარიამ გუნდის წევრების წარდგენისას.

საქართველოს კლინიკების ასოციაციის პრეზიდენტმა, ვილი პაჭკორიამ აღნიშნა, რომ დროა ქვეყანაში უსამართლობა და უკუსვლა დასრულდეს, სწორედ ამიტომ უერთდებიან სამედიცინო საზოგადოების წარმომადგენლები პარტიას.

"ეპიდემიის მართვა არ უნდა იყოს პოლიტიზირებული და ეპიდემიოლოგიური სამსახური უნდა ჩამოშორდეს პოლიტიკას და გახდეს დამოუკიდებელი. სამწუხაროდ, დღეს საქართველოში ეპიდემიოლოგიური სამსახური იმართება პოლიტიკური შეხედულებებისამებრ, ხოლო ეპიდემიოლოგებს, სამწუხაროდ, მართავენ პოლიტიკოსები, რაც ყოვლად დაუშვებელი და მიუღებელია", — განაცხადა პაჭკორიამ.

კლინიკების ასოციაციის პრეზიდენტის თქმით, აუცილებელია, რომ სასაზღვრო გამშვებ პუნქტებში გამკაცრდეს რეგულაციების კონტროლი და რეგიონებში გაფართოვდეს მობილური ჯგფების მუშაობა.

ვილი პაჭკორიას მოსაზრებას პანდემიის მართვის პოლიტიზირებასთან დაკავშირებით, ეთანხმება გიორგი ჩახუნაშვილიც.

"ჩვენ გვჭირდება დღეში 40 000 აცრილი, რაც ერთი თვის განმავლობაში მოგვცემს შესაძლებლობას აცრილი იყოს 1 200 000. ეს შეგვიძლია გაძლიერებული მარკეტინგით, გაძლიერებული ინტენსიური პროპაგანდით, რომ აცრა არის აუცილებელი და ერთადერთი გამოსავალი, რათა ყველამ იცოდეს, რომ პანდემიას დაამარცხებს მხოლოდ ვაქცინაცია", — განაცხადა ჩახუნაშვილმა.

ხოშტარიამ დროას წევრების ნაწილი 12 აგვისტოს წარადგინა. ელენე ხოშტარია თბილისის საკრებულოს თავმჯდომარეობის კანდიდატია, მაჟორიტარობის კანდიდატები კი დროამ ევროპულ საქართველოსა და გირჩი — მეტი თავისუფლებასთან ერთად წარადგინა. სამი პარტიის მიერ წარდგენილ კანდიდატებს დედაქალაქში მხარს დაუჭერს ნაციონალური მოძრაობაც.