იაშვილის სახელობის ბავშვთა ცენტრალური საავადმყოფოს სამედიცინო დირექტორი, ივანე ჩხაიძე აცხადებს, რომ საქართველოში გარდაცვალების მხრივ ყველაზე მძიმე პერიოდი აგვისტოს ბოლო და სექტემბრის პირველი კვირა იქნება.

"უნდა ჩავთვალოთ, რომ მეოთხე ტალღის პიკი იყო 17 აგვისტოს, ამის შემდეგ თანდათან ინფიცირებულების რაოდენობა მცირდება. რაც ყველაზე მთავარია, აქტიური შემთხვევების რაოდენობაა შემცირებული 61 000-დან ჩამოვედით 53 000-მდე, მაგრამ ჩვენი ძირითადი სატკივარი არის, რა თქმა უნდა, გარდაცვალება. თუ შევადარებთ იმ მაჩვენებელს, რომელიც დღეს გვაქვს, ჩენ ამის შესახებ ვლაპარაკობდით მაშინ, როდესაც შევაფასეთ 17 აგვისტოს კვირა, როგორც ყველაზე მაღალი მაჩვენებლის მქონე. როგორც წესი, ინფიცირების ეპიდემიოლოგიური კლინიკური მიმდინარეობიდან გამომდინარე, 3 კვირის შემდეგ უკვე უწევს ინფიცირებულობის პიკს გარდაცვალების პიკი, ამიტომ სწორედ აგვისტოს ბოლო და სექტემბრის პირველი კვირა იქნება საქართველოში ამ მხრივ ყველაზე მძიმე. ამ პერიოდში ველოდებით მაღალ მაჩვენებელს", — განაცხადა მან TV პირველის ეთერში.

29 აგვისტოს მონაცემებით, საქართველოში კორონავირუსის 2 669 ახალი შემთხვევა დადასტურდა, გამოჯანმრთელდა 6 177 პირი, ხოლო გარდაიცვალა — 76 ადამიანი.

ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 543 118-ს, მათგან გამოჯანმრთელდა — 482 732, ხოლო ვირუსს ჯამში ემსხვერპლა 7 251 ადამიანი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: