დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, სწავლა, სავარაუდოდ, დისტანციურ რეჟიმში დაიწყება. მისი თქმით, აუცილებელია, რომ დადებითობის მაჩვენებელი არ აღემატებოდეს 4%-ს და სკოლის პერსონალის 80% იყოს ვაქცინირებული.

"სწავლა, ვფიქრობ, განათლების სამინისტრო განიხილავს ამას და დაიწყება დისტანციურად. ჩვენი რეკომენდაციაა, დაავადებათა კონტროლის ცენტრის, არ ვიცი საბჭო როგორ გაითვალისწინებს, სანამ დადებითობის მაჩვენებელი არ ჩამოვა 4%-ის ქვემოთ (დღეს გვაქვს 9,43%) და 80% ადმინისტრაციული პერსონალის სკოლაში, პედაგოგ-მასწავლებლების არ იქნება აცრილი, ჩვენ ვერ განვიხილავთ სკოლას უსაფრთხოდ. ამიტომ, სასურველია, რომ მასწავლებლები აიცრან, ადმინისტრაციული პერსონალი აიცრას სკოლებში და საერთო ეპიდსიტუაცია გაუმჯობესდეს. ამ შემთხვევაში, რა თქმა უნდა, იქნება დაწყებული დასწრებული სწავლის განხილვა", — თქვა გამყრელიძემ.

მას ანალოგიური დამოკიდებულება აქვს უნივერსიტეტების სწავლის პროცესის მიმართაც და აღნიშნავს, რომ უმაღლეს სასწავლებლებში დამატებით საჭიროა, რომ სტუდენტების უმრავლესობაც აცრილი იყოს.

"მე პირადად, იგივე შეხედულება მაქვს უნივერსიტეტებთან მიმართებაში. დასწრებული სწავლებისთვის რამოდენიმე ეს კრიტერიუმი უნდა იყოს დაკმაყობილებული, ანუ, მარტო პროფესორ-მასწავლებლები არა, სტუდენტები, 150 000 სტუდენტია, ესენი ყველა ახალგაზრდები არიან, ეს დელტა შტამი ძალიან ადვილად ვრცელდება ახალგაზრდებში, ძალიან გადამდებია, ამიტომ, სასურველია, რომ სწავლის დაწყებისთვის ყველა უნივერსიტეტი, ყველა სკოლა იყოს უსაფრთხო", — განაცხადა დაავადებათა კონტროლის ეროვნული ცენტრის ხელმძღვანელმა.

26 აგვისტოს მდგომარეობით, დადებითობის დღიური მაჩვენებელი არის 9,43%, ბოლო 14 დღის განმავლობაში — 10,70%, ხოლო 7 დღის — 10,4%.

ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 536 202-ს, მათგან გამოჯანმრთელდა — 473 502, ხოლო ვირუსს ჯამში ემსხვერპლა 7 101 ადამიანი.

27 აგვისტოს მონაცემებით, საქართველოში სრულად ვაქცინირებულია მოზრდილი მოსახლეობის 12,1%, რაც 345 315 ადამიანს შეადგენს. 1 დოზით აცრილია 749 754 პირი, რაც მოზრდილი მოსახლეობის 26,3%-ია. ამასთან, დღეის მდგომარეობით, ჯამში ჩატარდა 1 095 069 აცრა, ხოლო 26 აგვისტოს აიცრა 26 418 ადამიანი.