ევროპული საქართველოს ინფორმაციით, თელავში პარტიის მაჟორიტარობის კანდიდატის შვილი გაიტაცეს. პარტიის ლიდერი, გიგა ბოკერია გატაცებულის ოჯახის წევრებზე დაყრდნობით ამბობს, რომ გამტაცებელი, შესაძლოა, კავშირში იყოს ქართული ოცნების ადგილობრივ ხელისუფლებასთან.

"ჩვენთვის რამდენიმე საათის წინ გახდა ცნობილი, რომ ჩვენი პოლიტიკური გუდნის წევრის, თელავის რაიონის სოფელ ნასამხრალის საკრებულოს წევრობის კანდიდატის, ნინო გალახვარიძის შვილი იქნა გატაცებული, ჩვენთვის, ამ მომენტისთვის, უცნობი პირების მხრიდან. ამ ფაქტთან დაკავშირებით სამართალდამცავები უკვე არიან საქმის კურსში ჩაყენებულები.

თქვენ იცით, რომ ჩვენს გუნდს არასოდეს ავტომატურად არ უსვრია ტალახი ხელისუფლების მიმართ, სანამ არ ვიცით და არ გვაქ საფუძველი, რომ პირდაპირ დავაბრალოთ პოლიტიკური მოტივი ამ ყველაფერს, მანამდე ჩვენ ამას არ ვაკეთებთ. ოღონდ ამ შემთხვევაში ჩვენ გვაქვს ზოგადი ვითარებიდან გამომდინარე და დამატებით, ოჯახის ინფორმაციაზე დაყრდნობით, რომ ეს შეიძლება იყოს კავშირში იმ პირებთან, რომლებიც ახლო ურთიერთობაში არიან ადგილზე ქართული ოცნების საარჩევნო მანქანასთან და ქართული ოცნების ადგილობრივ ხელისუფლებასთან, სახელდება ვინმე კუპრაშვილის გვარი", — აცხადებს ბოკერია.

როგორც შინაგან საქმეთა სამინისტროში On.ge-ს განუცხადეს, გამოძიება სისხლის სამართლის კოდექსის 143 მუხლით დაიწყო, რაც თავისუფლების უკანონო აღკვეთას გულისხმობს.