სახალხო დამცველის, ნინო ლომჯარიას განცხადებით, არჩევნების გადადებასთან დაკავშირებით გაკეთებული განცხადების ადრესატი პრემიერმინისტრი იყო, რადგან მას აქვს უფლება გამოაცხადოს საგანგებო მდგომარეობა, რაც არჩევნების გადადების ერთადერთი საფუძველია.

"ჩემი მიმართვის ადრესატი იყო პრემიერმინისტრი, რადგან მას აქვს უფლება, რომ გამოაცხადოს საგანგებო მდგომარეობა და საგანგებო მდგომარეობა არის არჩევნების გადადების ერთადერთი საფუძველი. საგანგებო მდგომარეობის გამოცხადების საფუძველი არის თავის მხრივ ეპიდემიოლოგიური მდგომარეობა, ასევე, მივმართავ ჯანდაცვის სექტორის წარმომადგენლებსაც, ეპიდემიოლოგებსაც, გააკეთონ თავიანთი პროგნოზები და გვითხრან, თუ რამდენად ზრდას ელოდებიან ინფიცირებულების არჩევნების შემდგომ და არის თუ არა ამისათვის მზად ჯანდაცვის სექტორი, ხომ არ გამოიწვევს ეს უფრო მეტი ადამიანის დაღუპვას", — განაცხადა მან.

ომბუდსმენი მოუწოდებს პოლიტიკოსებს, რომ ეპიდემიოლოგებთან ერთად შეაფასონ ის რისკები, რაც შეიძლება თან ახლდეს არჩევნების ჩატარებას.

"თუ ჩვენ შეგვიძლია თავიდან ავიცილოთ უფრო მეტი ადამიანის გარდაცვალება, რატომ არ ვდგამთ მაშინ ჩვენ ამ ნაბიჯს. მე ვფიქრობ, რომ დღეს ადამიანის სიცოცხლე არის ყველაზე მნიშვნელოვანი და ვფიქრობ, რომ ყველა პოლიტიკოსის უპირველესი ვალდებულებაა ფიქრობდეს ამაზე, ამიტომ პოლიტიკოსებსაც მოვუწოდებ, ეპიდემიოლოგებთან ერთად ადიწყონ ამ საკითხზე მსჯელობა და შეაფასონ ის რისკები, რაც შეიძლება ახლდეს არჩევნების ჩატარებას", — ამბობს ლომჯარია.

სახალხო დამცველმა, ნინო ლომჯარიამ განაცხადა, რომ როცა ქვეყანაში დღიურად 60-70 ადამიანი იღუპება და მოქალაქეთა სათანადო რაოდენობა ვაქცინირებული არ არის, არ შეიძლება, "ყველაფერი იყოს ღია". მისი თქმით, ეპიდვითარების დასტაბილურებამდე, საჭიროა რეგულაციების გამკაცრება და არჩევნების გადადებაზე ფიქრი.

ქართული ოცნება არჩევნების გადადებაზე უარს ამბობს. პარტიის ერთ-ერთმა ლიდერმა, მამუკა მდინარაძემ განაცხადა, რომ ოპოზიციას არჩევნებში მონაწილეობა მაინც მოუწევს.

გაიგეთ მეტი: