საქართველოს პრემიერ-მინისტრის გიორგი კვირიკაშვილის თქმით, ბათუმში მომხდარი ინციდენტი დაგეგმილ ელფერს ატარებდა და მისი პროვოცირება არავის უნდა შერჩეს. პრემიერმა მთავრობის სხდომის დაწყებამდე მადლობა გადაუხადა ყველა პოლიციელს და სახელმწიფო მოხელეს, რომელმაც მისი თქმით, მოთმინება და ვაჟკაცობა გამოიჩინა:

"მინდა ორიოდე სიტყვით მადლობა ვუთხრა ყველა ადამიანს მათი მოზომილი, შეწყობილი მოქმედებების შედეგად ჩვენ შევძელით, რომ ძალიან სერიოზულ პროვოკაციას თავი ავარიდეთ და მართლაც, ბეწვის ხიდზე გავიარეთ... მინდა ვთქვა, რომ გამოძიება აუცილებლად გაგრძელდება და მივა დასასრულამდე და აუცილებლად უნდა დაისაჯოს ის, ვინც სახელმწიფოებრიობის წინააღმდეგ ნაბიჯი გადადგა."

11 მარტს პატრულმა მოძრაობის შეფერხებისა და არასწორი პარკირებისთვის მოქალაქე დააჯარიმა, რასაც ჯერ სიტყვიერი და ფიზიკური დაპირისპირება, მოგვიანებით კი საპროტესტო აქცია მოჰყვა. აღნიშნული აქცია არეულობაში გადაიზარდა, რა დროსაც აქციის მონაწილეებმა დაწვეს და დააზიანეს როგორც ავტომობილები, ისე საგზაო ინფრასტრუქტურა.