ყირიმის პლატფორმის მონაწილე პრემიერმინისტრი ირაკლი ღარიბაშვილი კიევში ევროპული საბჭოს პრეზიდენტს, შარლ მიშელს შეხვდა. მთავრობის სტრატეგიული კომუნიკაციების დეპარტამენტის უფროსის, ნინო გიორგობიანის განცხადებით, შეხვედრა არაფორმალური იყო. უცნობია, რაზე ისაუბრეს მათ.

მიშელი და ღარიბაშვილი მონაწილეობენ ყირიმის პლატფორმაში, რომლის მიზანი რუსული აგრესიისა და უკრაინის ნახევარკუნძულის ანექსიის დაგმობაა. სწორედ აქ გადაიკვეთენ ისინი.

მთავრობამ გაავრცელა კადრები, რომელზეც ასახულია, როგორ აჯილდოვებს უკრაინის პრეზიდენტი მიშელსა და ღარიბაშვილს, მსოფლიოს სხვა ლიდერებთან ერთად პირველი ხარისხის ორდენით. ამ კადრების დასასრულს ჩანს, რომ ისინი საუბრობენ. გიორგობიანის გავრცელებულ კადრებში კი ისინი სხვა სიტუაციაში არიან.