დეპუტატი, ნაციონალური მოძრაობის პოლიტსაბჭოს წევრი კობა ნაყოფია აცხადებს, რომ უკრაინიდან საქართველოში დაბრუნებისას საზღვარზე ერთი საათით შეაყოვნეს და ბარგი გაუჩხრიკეს. მისი თქმით, საბაჟოს წარმომადგენლები ფაქტს "ტექნიკური ხარვეზით" ხსნიდნენ, თუმცა თავად ამის არ სჯერა და ინციდენტს უკრაინაში, ექსპრეზიდენტ მიხეილ სააკაშვილთან შეხვედრას უკავშირებს.

"ერთი საათი მე გახლდით გაჩერებული საზღვარზე. თავიდან მეუბნებოდნენ, რომ ეს არის ტექნიკური ხარვეზი. რა თქმა უნდა, მე ამ ტექნიკური ხარვეზის არ მჯერა, იმიტომ, რომ ზუსტად ვიცი, რომ ყველა ის მგზავრი, რომელიც ჩამოვიდა იგივე რეისით — მე გახლდით კიევში, ვხვდებოდი პრეზიდენტ სააკაშვილს და დღეს მოვფრინავდი კიევიდან საქართველოში — ყველა მგზავრი, რა თქმა უნდა, გაატარეს, დარჩენილი ვიყავი მარტო მე.

ელოდებოდნენ ჩემს ბარგს, რომელიც დროზე არ იქნა, რატომღაც, მოტანილი. ეტყობა ათვალიერებდნენ ჩემს ბარგს. მერე ხელჩანთაც გაჩხრიკეს, რისი უფლებაც, სხვათა შორის, არ ჰქონდათ, მაგრამ, ყველანაირი კანონის დარღვევით ქნეს ეს", — განაცხადა კობა ნაყოფიამ.

ნაყოფია ამბობს, რომ მისი, როგორც დეპუტატის ჩანთის ჩხრეკის უფლება მებაჟეებს არ ჰქონდათ, ამიტომ, ფაქტზე რეაგირებისკენ პარლამენტის თავმჯდომარეს მოუწოდებს. ის, ასევე, აპირებს სამართალდამცავ ორგანოებს მიმართოს.

"რა თქმა უნდა, ჩვენი მხრიდან იქნება სათანადო რეაგირება და მე, პირველ რიგში, მოვუწოდებ პარლამენტის თავმჯდომარეს, ბატონ კუჭავას, რომ ეს ინციდენტი იქნას გამოძიებული. ჩვენ აუცილებლად მივმართავთ სამართალდამცავ ორგანოებს ამ ინციდენტის გამოძების საკითხთან დაკავშირებით", — განაცხადა კობა ნაყოფიამ.

On.ge დაუკავშირდა შინაგან საქმეთა სამინისტროსაც, სადაც გვითხრეს, რომ კითხვებზე ინფორმაციის გადამოწმების შემდეგ გვიპასუხებენ. უწყების ოფიციალურ პასუხს მიღებისთანავე შეგატყობინებთ.