საქართველოს 16 მოქალაქე, რომლებიც ავღანეთიდან 20 აგვისტოს გამოფრინდნენ, უკვე სამშობლოში არიან. ისინი ქაბულიდან თბილისში ამერიკელი, ბრიტანელი, თურქი და უნგრელი პარტნიორების დახმარებით ჩამოვიდნენ.

"ეს იყო საკმაოდ რთული მოლაპარაკებების პროცესი და ძალიან დაგვეხმარნენ ჩვენი მეგობარი ქვეყნები, ორგანიზაციები და სახელმწიფო უწყებები, ვისთანაც ვაწარმოებდით მოლაპარაკებებს. მთავარი არის ის, რომ მიზანი მიღწეულია, ჩვენი მოქალაქეები თბილისში არიან [...]

რამდენიმე ქვეყანა გამოიარეს და ყველგან სათანადო მხარდაჭერა ჰქონდათ როგორც სახელმწიფო უწყებების მხრიდან, ასევე საგარეო უწყების და საკონსულო სამსახურების მხრიდან", — განაცხადა რევაზ ჯაველიძემ, მთავრობის ადმინისტრაციის უფროსის მოადგილემ.

მთავრობის ადმინისტრაციის ინფორმაციით, მას შემდეგ, რაც ავღანეთის დედაქალაქი, ქაბული, თალიბანმა დაიკავა, ქვეყანა საქართველოს 24-მა მოქალაქემ დატოვა. 6 მათგანი ქვეყანაში 18 აგვისტოს ჩამოვიდა, 2 კი, გავრცელებული ინფორმაციით, 19 აგვისტოს გამოფრინდა ქაბულიდან. თავდაცვის სამინისტროს ინფორმაციით, ისინი ყოფილი სამხედროები არიან და ავღანეთში, კერძო კონტრაქტით, ამერიკულ და კანადურ კომპანიებში იყვნენ დასაქმებულები.

წაიკითხე ასევე:

  • 20-წლიანი ომი ავღანეთში — რას (ვერ) მიაღწია ამერიკამ?