ჯანდაცვის მინისტრის, ეკატერინე ტიკარაძის განცხადებით, დღეიდან ამოქმედებული შეზღუდვები, დაახლოებით, 80%-მდე გააუმჯობესებს ეპიდვითარებას. ამის შესახებ მან ჟურნალისტებთან ისაუბრა.

"თუმცა იმისთვის, რომ ეს ჩვენ ფაქტობრივად დავინახოთ, საჭიროებს გარკვეულ პერიოდს და ეს პერიოდი, როგორც უკვე მთელმა საზოგადოებამ იცის, 2 კვირის ვადაში განიხილება ხოლმე. სწორედ აქედან გამომდინარე იქნა საბჭოს მიერ გადაწყვეტილი, რომ 3-კვირიანი შეზღუდვა არის, რათა ჩვენ 2 კვირის განმავლობაში შევძლოთ და დავაკვირდეთ იმ დადებით პროგრესს, რომელიც ეპიდემიის გაუმჯობესების კუთხით არის მოსალოდნელი", — განაცხადა ტიკარაძემ.

საკოორდინაციო საბჭოს გადაწყვეტილებით, დღეს, 14 აგვისტოდან მუნიციპალური ტრანსპორტის მოძრაობა 4 სექტემბრამდე იზღუდება. შეზღუდვა არ ეხება საქალაქთაშორისო ტრანსპორტს.

ტრანსპორტის შეზღუდვის პირობებში, ვაქცინაციის დიდ ცენტრებამდე მოქალაქეების გადაყვანა სპეციალური ტრანსპორტით მოხდება.

მომავალი სამ კვირის განმავლობაში იმოქმედებს სხვა შეზღუდვებიც. კერძოდ:

  • სრულად იზღუდება ფესტივალები, მასობრივი ღონისძიებები, კონცერტები და სპორტული შეჯიბრებები, გარდა იმ სპორტული შეჯიბრებებისა, რომელიც იმართება საერთაშორისო ეგიდით;
  • იზღუდება ბავშვთა გასართობი ცენტრების მუშაობა;
  • კვების ობიექტების მუშაობა, ნაცვლად ღამის 00:00 საათისა, დასაშვები იქნება 23:00 საათამდე;
  • საჯარო უწყებებს ეძლევათ დავალება, მაქსიმალურად გადაიყვანონ თანამშრომლები მუშაობის დისტანციურ რეჟიმზე და ანალოგიური რეკომენდაციით მიმართეს კერძო სექტორს.