თბილისის რესპუბლიკური საავადმყოფოს კლინიკური დირექტორი დევი ტაბიძე ამბობს, რომ კორონავირუსით ინფიცირებისა და გარდაცვალების რაოდენობამ ძალიან მაღალ ნიშნულს მიაღწია და თუ ასე გაგრძელდა, დაახლოებით, ორი-სამი კვირის განმავლობაში ჯანდაცვის სისტემა ჩავარდება კოლაფსში. ამის მიუხედავად ის საველე ჰოსპიტლების პრინციპის მომხრე არ არის.

"ეს ყველაფერი მიგვიყვანს საბოლოო ჯამში იქამდე, რომ ჩვენ ძალიან დიდი რაოდენობით ჩვენს თანამოქალაქეებს, ჩვენს ნათესავებს, ჩვენს ახლობლებს, მეგობრებს, არც მეტი, არც ნაკლები, არავის არ ვაშინებ, მაგრამ დავკარგავთ", — განაცხადა ტაბიძემ.

დევი ტაბიძემ აღნიშნა, რომ მისი აზრით, საველე ჰოსპიტლები კოვიდის მართვისთვის ეფექტური არ იქნება და ეს კიდევ უფრო გაზრდის ვირუსის გადადების საშიშროებას.

"თქვენ წარმოგიდგენიათ ასეთ საველე პირობებში, სადაც ერთ დიდ დახურულ სივრცეში განთავსდება ასზე მეტი პაციენტი სხვადასხვა თავისი ჩივილებით და იმ არადაცული სანიტარული წესები, ვენტილაცია და სხვადასხვა. ამას სჭირდება სპეციალიზირებული მართვა, ამას სჭირდება სპეციალური მენეჯმენტი, ამას სჭირდება სამხედო ექიმების მობილიზება, რომლებსაც ინფექციასთან ბრძოლის არანაირი გამოცდილება არ გააჩნიათ. გეთანხმებით, შესაძლებელია მივიღოთ დაჭრილები, მივიღოთ სხვადასხვა, ის, რაც მას პირადად ევალება [...] ჩვენ ამის მართვისთვის მზად არ ვართ", — ამბობს რესპუბლიკური საავადმყოფოს კლინიკური დირექტორი.

ტაბიძის თქმით, გამოუვალ სიტუაციაში საველე ჰოსპიტლები უნდა გაიხსნას, მაგრამ იქ მომუშავე სამხედრო ექიმებმა მხოლოდ პირველადი დახმარება უნდა გაუწიონ ინფიცირებულებს.

რესპუბლიკური საავადმყოფოს კლინიკური დირექტორის აზრით, არსებული სიტუაციიდან ერთადერთი გამოსავალი არის მოსახლეობის მაღალი პასუხისმგებლობის გრძნობა, სრული ვაქცინაცია, პირბადის ტარება როგორც დახურულ, ისე ღია სივრცეებში და მაქსიმალურად თავის არიდება მასობრივი შეკრებებისგან.

შეგახსენებთ, ჯანდაცვის მინისტრმა, ეკატერინე ტიკარაძემ განაცხადა, რომ სამინისტრო უკვე ზრუნავს იმ სივრცეების მობილიზებაზე, სადაც, შესაძლოა ე.წ. საველე ჰოსპიტლები განათავსონ. ტიკარაძის თქმით, ეს მისთვის ძალიან არასასურველი გადაწყვეტილება იქნება, თუმცა შიდა ჯგუფებში მაინც საუბრობენ ე.წ. საველე ჰოსპიტლების საჭიროებაზე. გუშინ უწყებათაშორის საკოორდინაციო საბჭოსთან არსებული ოპერაციული შტაბის უფროსმა, გიორგი ღიბრაძემ განაცხადა, რომ ვაქცინაციის პროცესში სამხედრო ექიმებიც ჩაერთვებიან, თუმცა საველე ჰოსპიტლებში მათ სავარაუდო მობილიზებაზე არაფერი უთქვამს.