ჯანდაცვის მინისტრმა, ეკატერინე ტიკარაძემ განაცხადა, რომ სამინისტრო უკვე ზრუნავს იმ სივრცეების მობილიზებაზე, სადაც, შესაძლოა ე.წ. საველე ჰოსპიტლები განათავსონ. ტიკარაძის თქმით, ეს მისთვის ძალიან არასასურველი გადაწყვეტილება იქნება, თუმცა შიდა ჯგუფებში მაინც საუბრობენ ე.წ. საველე ჰოსპიტლების საჭიროებაზე.

"ჯანდაცვის სამინისტრო ზრუნავს უკვე გარკვეული სივრცეების მობილიზებაზე. ე.წ. საველე ჰოსპიტლების გახსნის ალბათობაზე ჩვენ უკვე ვსაუბრობთ შიდა ჯგუფში. თუმცა, რა თქმა უნდა, თქვენ იცით, წინა ტალღებიდან გამომდინარე, რომ ჩემთვის ეს არის ძალიან არასასურველი სურათი და მეორე ტალღის პერიოდშიც მე ვიღებდი მტკიცე გადაწყვეტილებას იმასთან დაკავშირებით, რომ ჩვენ არ უნდა გაგვეხსნა საველე ჰოსპიტლები, ვინაიდან ეს მოქმედებს როგორც მკურნალობის ხარისხზე, ასევე მოსახლეობის ფსიქო-ემოციურ მდგომარეობაზე და ჩემთვის ეს არის მნიშვნელოვანი", — განაცხადა ტიკარაძემ რუსთავი 2-ის ეთერში.

ჯანდაცვის მინისტრმა არ დააკონკრეტა, რომელი სივრცეები განიხილება ე.წ. საველე ჰოსპიტლებისთვის. თუმცა, ყურადღება გაამახვილა იმაზე, რომ მნიშვნელოვანია ეს სივრცეები კომფორტული იყოს როგორც ექიმებისთვის, ისე პაციენტებისთვის.

"ძალიან არასასიამოვნო იქნება, რა თქმა უნდა, კარვებში ამ ყველაფრის ნახვა და ღია სივრცეებში. შესაბამისად, ჩვენ მაქსიმალურად ვეცდებით, რომ შერჩეული იყოს ისეთი სივრცე, სადაც იქნება მინიმალური ფსიქო-ემოციური ზეწოლა მოსახლეობაზე და მაქისმალური კომფორტი იქნება შექმნილი როგორც ექიმებისთვის, ასევე პაციენტებისთვის. ამ ეტაპისთვის, ზუსტი გადაწყვეტილება ამასთან დაკავშირებით მიღებული არ არის, ვინაიდან მიმდინარეობს სხვადასხვა სივრცის შერჩევა და დამუშავება, რის შემდეგაც, რა თქმა უნდა, ჩვენ დავსხდებით და ყველა სივრცესთან მიმართებაში დადებით და უარყოფით მხარეებზე ვიმსჯელებთ", — განაცხადა ტიკარაძემ.

აღსანიშნავია, რომ აქამდე, როცა ჟურნალისტები ე.წ. საველე ჰოსპიტლების საჭიროებებზე კითხვებს სვამდნენ, ტიკარაძე და მისი მოადგილე, თამარ გაბუნია, მუდმივად აღნიშნავდნენ, რომ მათ ნაცვლად საქართველოში კოვიდსასტუმროებს ვიყენებთ. თუმცა, როგორც აღმოჩნდა, შესაძლოა კოვიდსასტუმროების პარალელურად ე.წ. საველე ჰისპიტლებიც გაიხსნას.

გაიგე მეტი: