საქართველოს პრეზიდენტის, სალომე ზურაბიშვილის განცხადებით, დღევანდელი დიდგორის ბრძოლა კორონავირუსის პანდემიასთან ომია.

"900 წლის წინ დიდგორი იყო ის ბრძოლა, საიდანაც საქართველო კავკასიის ხალხებთან, ერთად მიუხედავად რელიგიური და ეროვნული ნიშნისა, გამოვიდა გამარჯვებული. ეს არამხოლოდ ეროვნული სიამაყის საფუძველია, არამედ წარმოადგენს ასევე, ჩვენი კავკასიური მომავლის გზასაც. დიდგორი დღეს ვერ შემოიფარგლება მხოლოდ იმით, რომ ვადიდოთ ჩვენი წინაპრების თავდადება, ვიამაყოთ ამ ღირსეული წარსულით და გმირობით. დღევანდელი ჩვენი დიდგორის ბრძოლა მოსაგებია, დღევანდელი დიდგორი პანდემიასთან ომია, რომელიც ემუქრება ჩვენს მოსახლეობას და მაშასადამე სახელმწიფოს, რომელმაც ჩვენი 6278 მოქალაქე უკვე იმსხვერპლა. ნუთუ ეს ამ მცირერიცხოვანი ერისათვის არ უდრის ბრძოლის ველზე დიდ დანაკარგს. დიდგორი დღესაც ჩვენი მოსაგებია, თუნდაც ეს არ იყოს საომარ ველზე", — განაცხადა პრეზიდენტმა.

მისივე თქმით, სამწუხაროა, რომ ეს საკითხიც გახდა ნიშნის მოგების, პოლიტიზირების და ერის დაპირისპირების საგანი.

"ჩვენ ნამდვილ ბრძოლაში ვიმყოფებით, ამ ბრძოლაშიც, როგორც 900 წლის წინ, უნდა ვიყოთ წინდახედულნი, გამბედავნი და ერთად შეკრულნი. სამწუხაროა, რომ ეს საკითხიც კი გახდა ნიშნის მოგების, პოლიტიზირების, ერის დაპირისპირების საგანი. სრულიად მიუღბელია, რომ გარედან კომფორტში მყოფი ზოგი ვიტომც პოლიტიკოსი ბედავს და ცილს სწამებს, შეურაცხყოფას აყენებს მედიცინის სამყაროს იმ თავდადებულ პიროვნებებს, რომლებმაც გარდა იმისა, რომ საქართველოს მედიცინა საზღვარგარეთ ასახელეს, უკვე წელიწად-ნახევარზე მეტია მუხლჩაუხრელად ემსახურებიან ხალხს და მათი სიცოცხლის გადარჩენას. დღეს ესენი არიან ჩვენი დიდგორისეული გმირები და დიდად პატივსაცემი თავდადებული პროფესიონალები, მათ უნდა ვუთხრათ მადლობა", — განაცხადა მან.