საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ ჯორჯიან უოთერ ენდ ფაუერი სალიცენზიო პირობების დარღვევის გამო დააჯარიმა. ჯარიმის ოდენობამ 75 000 ლარი შეადგინა. ამის შესახებ სემეკის ოფიციალური განცხადებაშია აღნიშნული.

"დაჯარიმების საფუძველია კომპანიის მიერ მრიცხველის ჩვენებების არარეგულარული წაკითხვა და მოქალაქეებზე გადასახადის ერთიანად დარიცხვა, რაც წარმოადგენს წესების დარღვევას", — აცხადებენ სემეკში.

მათი ცნობით, სემეკში შემოსული მოქალაქეთა საჩივრების შესაბამისად, GWP მრიცხველის ჩვენებებს იღებდა არა ყოველთვიურად, არამედ გარკვეული პერიოდულობით, რამდენიმე თვის ან/და წლის შუალედში, რის გამოც აბონენტებს ერთიანად უწევდათ რამდენიმე თვის გადასახადის გადახდა.

"ამასთანავე, მომხმარებლები საჩივრებში მიუთითებდნენ, რომ 2021 წელს კომპანიის მიერ აღებულ რეალურ ჩვენებებში შესული იყო 2020 წელს მოხმარებული წყლის მოცულობებიც, რომლებიც შპს ჯორჯიან უოთერ ენდ ფაუერის მიერ დაანგარიშდა ახალი ტარიფით და არა 2021 წლის 1-ლ იანვრამდე მოქმედი ტარიფით", — ნათქვამია განცხადებაში.

სემეკის ცნობით, ჩატარებული მოკვლევის შედეგად დადგინდა, რომ GWP-ის მრიცხველიანი მომხმარებლების უმეტესობის შემთხვევაში მსგავსი ტიპის დარღვევები იკვეთებოდა. მათი ინფორმაციით, კომპანიას განემარტა, რომ დარღვევების აღმოუფხვრელობის ან მათი განმეორების შემთხვევაში, სემეკი იმსჯელებს კომპანიის განმეორებით დაჯარიმებაზე.