ევროპული საქართველოს ლიდერის, გიგა ბოკერიას განცხადებით, მერამდენე ტალღაა, რაც ქვეყანაში საწოლფონდების კრიზისია. მისი თქმით, სახელმწიფოს რესურსი უნდა დახარჯულიყო იმისთვის, რომ ეს რაოდენობა გაზრდილიყო.

"მერამდენე ტალღაა, რომ მორიგ ჯერზე გვაქვს კრიზისი, რომ არ გვყოფნის საწოლები. რისთვის დაიხარჯა ის უზარმაზარი რესურსები, თუ არა იმისთვის უნდა დახარჯულიყო, რომ ეს საწოლების რაოდენობა და მიმღებლობის რესურსი გაზრდილიყო დრამატულად სამედიცინო სექტორის. ვაქცინაციის შემდეგ თუ რამე არის ფაქტორი, ეგ არის. ეგეც ფეხებზე რატომ დაიკიდეს?", — თქვა მან TV პირველის ეთერში.

დღეს ჯანდაცვის სამინისტროს კოვიდპაციენტებისთვის მაქსიმუმ 8 000 საწოლის გამოყენება შეუძლია. ჯანდაცვის მინისტრს, ეკატერინე ტიკარაძეს არაერთხელ უსაუბრია იამზე, რომ საწოლფონდთან მიმართებაში ჯანდაცვის სექტორი უკვე "გარკვეულ ზღვარზეა". 11 აგვისტოს ტიკარაძემ ისაუბრა იმაზეც, რომ სამინისტრო უკვე ზრუნავს იმ სივრცეების მობილიზებაზე, სადაც, შესაძლოა ე.წ. საველე ჰოსპიტლები განათავსონ.