რამაზ ხიმშიაშვილმა, რომლის დაჯარიმებისა და დაკავების შემდეგ, 11 მარტს, ბათუმში საპროტესტო გამოსვლა დაიწყო, უკვე გათავისუფლებულია. მასთან ერთად იზოლატორი დატოვეს სხვა დაკავებულებმაც. როგორც შს მინისტრმა თქვა, მან დაკავებულების გათავისუფლება აჭარის მთავრობის მეთაურის თხოვნით მიიღო, თუმცა ისინი სასამართლოს წინაშე მაინც წარსდგებიან.

რამაზ ხიმშიაშვილი პოლიციისთვის წინააღმდეგობის გაწევის გამო, ადმინისტრაციული სამართალდარღვევათა კოდექსის 173–ე მუხლის საფუძველზე დააკავეს. მისი დაკავებას მოჰყვა კიდევ ერთი პირის დაკავება, შემდეგ საპროტესტო აქცია. ჯამში, სამართალდამცავებმა ექვსი მოქალაქე დააკავეს.

ხიმშიაშვილმა აჭარის საზოგადოებრივი მაუწყებლის ეთერში თქვა, რომ მას პოლიციისთვის წინააღმდეგობა არ გაუწევია. როგორც ის ამბობს, მან პოლიციელს სთხოვა, არ დაეჯარიმებინა ავტომობილის არასწორად გაჩერებისთვის, თუმცა უშედეგოდ, რის შემდეგაც დააკავებს. ხიმშიაშვილი ითხოვს, რომ გამოქვეყნდეს პოლიციელის მიერ ფორმაზე დამაგრებული სპეციალური კამერის ჩანაწერი, სადაც გამოჩნდება რეალური სურათი იმისა, თუ რა მოხდა.

უკვე რამდენიმე საათია, ბათუმში ადამიანთა ჯგუფები წვავენ პოლიციის ავტომობილებს, საბურავებს, ისვრიან ქვებს.