პრემიერმინისტრი, ირკალი ღარიბაშვილი ქვეყანაში ვაქცინაციას საკუთარ დამსახურებად აცხადებს მაშინ, როდესაც ხელისუფლების მხრიდან მუდმივად კეთდებოდა და კეთდება განცხადებები იმაზე, რომ ვაქცინების შემოტანისთვის ზრუნვა ერთ-ერთმა პირველებმა ჯერ კიდევ შარშან დავიწყეთ. ამის შესახებ მან წალკაში ქართული ოცნების მერობის კანდიდატის წარდგენისას ისაუბრა.

ღარიბაშვილს გიორგი გახარია პირდაპირ არ დაუსახელებია, თუმცა მისი პრემიერობის დროზე ისაუბრა და გააკრიტიკა. კერძოდ, აღნიშნა, რომ ლარის კურსი იყო მაღალი, ეკონომიკა ჩაკეტილი და შეზღუდვებით საზოგადოებაში იყო პესიმიზმი. მისი თქმით, ამას "ხელოვნური საბოტაჟი" ემატებოდა, მისი მოსვლიდან რამდენიმე თვეში კი ყველაფრის გამოსწორება ისე მოხერხდა, რომ "ეკონომიკური ზრდის ტემპით მთელ მსოფლიოში ერთ-ერთი ყველაზე მოწინავე ქვეყანა გავხდით". ვაქცინაციის დაწყებაზე კი ამბობს, რომ შემოტანა პირადი ნაცნობობით მოახერხა მაშინ, როცა მის პრემიერობამდე მეილებზე პასუხს ელოდებოდნენ.

"5 თვის წინ, როცა მე დავინიშნე პრემიერ-მინისტრად, მაშინ ქვეყანაში არც ვაქცინები გვქონდა, ლარი იყო 3.5-ზე, ეკონომიკა იყო ჩაკეტილი და გაჩერებული ყველაფერი, გვქონდა ჩვენ კომენდანტის საათი, შეზღუდვები და ა.შ. იყო სრული პესიმიზმი და ნიჰილიზმი, ამას ემატებოდა ის საბოტაჟი და ხელოვნული პოლიტიკური კრიზისი, რომელიც იყო შექმნილი ქვეყანაში.

დღეს რა ვითარება გვაქვს? — ლარი არის სტაბილური. მაქსიმალურად ამ მოკლე დროში, 5 თვეში, შევძელით დასტაბილურება და ჩამოვიდა, 40 პუნქტით გამყარდა. ამას გარდა, ჩვენ ე.ი. ეკონომიკური ზრდის ტემპით ვართ ერთ-ერთი მოწინავე მთელ მსოფლიოში. 45%-იანი ზრდა გვქონდა აპრილში, მაისში 25%-იანი, ივნისში 18%-იანი. 12,7% გვაქვს 6 თვის ზრდის მაჩვენებელი, რაც არის უპრეცედენტო ბოლო წლების განმავლობაში, ორნიშნა ზრდა ჩვენ არ გვქონია 2006 წლის შემდეგ", — აცხადებს ღარიბაშვილი.

საქართველოში ვაქცინაცია მარტის შუა რიცხვებში დაიწყო და 11 აგვისტოს მონაცემებით, თითქმის 5 თვეში აცრილია 688 940 ადამიანი, საიდანაც სრულად აცრილი 200 000 ათასზე ცოტა მეტია.