თბილისის მერმა, კახა კალაძემ მოსახლეობას აცრისკენ მოუწოდა და განმარტა, რომ ვართ ომში, სადაც იარაღი არის ვაქცინა. მანვე აღნიშნა, რომ საყვარელი ადამიანების, ოჯახის დასაცავად მხოლოდ ეს გზა არსებობს და სთხოვა მოსახლეობას, გამოიყენონ ეს შესაძლებლობა.

"დღეს ომია და ამ ომში გამარჯვებული არის ის, ვინც მტერს იარაღით, ცოდნით და გონიერებით დაუპირისპირდება. ეს იარაღი ამ ომში არის ვაქცინა. მე იმედი მაქვს ჩვენი საზოგადოების გონიერების, რაც ჩვენნაირი პატარა ერის სიცოცხლისუნარიანობის მთავარი ღერძია. მხოლოდ საფრთხეების რეალური გაცნობიერებით შევძლებთ, ამ გამოწვევას ღირსეულად გავუმკლავდეთ.

ავიცრათ, რათა დავიცვათ საკუთარი ჯანმრთელობა, სიცოცხლის უსაფრთხოება, და, რა თქმა უნდა, ჩვენი შვილები, ჩვენი დედები, მამები, ბებიები და ბაბუები. ამიტომ, ყველას მინდა ვთხოვო, მოვუწოდო, რომ ერთადერთი გადარჩენის გზა, ამ რთულ ვითარებაში, რასაც მთელი მსოფლიო ებრძვის, ამ უხილავ მტერს, რომელსაც კოვიდ19 ჰქვია, ერთადერთი გამოსავალი და შესაძლებლობა, ეს არის აცრა. ჩვენ ყველანაირი საშუალება გვაქვს ვაქცინაციის და კიდევ ერთხელ მინდა ვთხოვო საზოგადოებას, რომ მაქსიმალურად გამოვიყენოთ ეს შესაძლებლობა და დავიცვათ ადამიანების სიცოცხლე, საკუთარი თავი და ირგვლივ მყოფი ადამიანები", — განაცხადა მან თბილისის მუნიციპალიტეტის მთავრობის სხდომაზე.

11 აგვისტოს მონაცემებით, საქართველოში კორონავირუსის 5 352 ახალი შემთხვევა დადასტურდა, გამოჯანმრთელდა 2 635, ხოლო გარდაიცვალა — 48 ადამიანი.

პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 461 198-ს, ჯამში გამოჯანმრთელებულთა რაოდენობა გაიზარდა 409 110-მდე, ხოლო ვირუსს ჯამში 6 230 პირი ემსხვერპლა.

საქართველოში 4 სხვადასხვა ვაქცინა, ფაიზერი, სინოფარმი, სინოვაკი და ასტრაზენეკა არის შემოტანილი. ვაქცინაცია შეუძლია ყველა მსურველს, 16 წელს ზევით. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.