კლინიკა ბომონდის მედიკოსები საზოგადოებას ღია წერილით მიმართავენ და კორონავირუსის საწინააღმდეგო ვაქცინის გაკეთებას სთხოვენ. კლინიკა წუხილს გამოთქვამს, რომ მათი პაციენტების უმრავლესობა ვაქცინირებული არ არის.

"ჩვენი რესურსიც ამოწურვადია, ამიტომ გთხოვთ, დაგვიდექით გვერდით — ჩაიტარეთ ვაქცინაცია, შეასრულეთ სპეციალისტების მითითებები, რადგან თუ თქვენ არ დაგვეხმარებით, თუ ერთმანეთს არ დავეხმარებით, შესაძლოა უბრალოდ ვეღარ შევძლოთ თქვენი ოჯახის წევრების დაცვა, ვერ გადავარჩინოთ თქვენი მშობლები, დედმამიშვილები, შვილები, მეუღლეები და უბრალოდ თქვენთვის საყვარელი ადამიანები. Covid-19 ვირუსისგან წართმეულ თითოეულ ადამიანს ჩვენს გულს ვატანთ", — ვკითხულობთ კლინიკის ექიმების ერთობლივ განცხადებაში.

კლინიკა ბომონდში აცხადებენ, რომ კორონავირუსუს წინააღმდეგ ბრძოლაში ქვეყანაში პანდემიის დაწყების მომენტიდან არიან ჩართულები. მათი თქმით, თვეების განმავლობაში ათასობით ადამიანის სიცოცხლე გადაარჩინეს, თუმცა, ჰქონდათ დღეებიც, როცა მარცხდებოდნენ სიკვდილთან ბრძოლაში.

"არ გვიწუწუნია კლინიკაში გადათენებულ მძიმე ღამეებზე, ხშირ შემთხვევაში კვირების განმავლობაში უნახავ ოჯახის წევრებზე-მშობლებზე. არ გვიფიქრია დასვენებაზე, როდესაც ვხედავდით რომ ჩვენ ვიყავით უამრავი ადამიანის ოჯახის იმედი და მათ იმედს ვერ გავუცრუებდით", — აცხადებენ კლინიკის ექიმები.

სწორედ ამ ვითარებიდან გამომდინარე მოუწდებენ ისინი საზოგადოებას თანადგომას ვაქცინაციის პროცესში აქტიური ჩართვით და ამით ერთმანეთის სიცოცხლის გადარჩენაში დახმარებას.

გაიგე მეტი: