ჯანდაცვის მინისტრის, ეკატერინე ტიკარაძის განცხადებით, მთავრობას, სავარაუდოდ, მოუწევს კოვიდშეზღუდვების გამკაცრება.

"ალბათ, მოგვიწევს ჩვენ კიდევ შეზღუდვების გამკაცრება გამომდინარე იქიდან, რომ სიტუაცია ნამდვილად არის ძალიან მძიმე", — განაცხადა ტიკარაძემ იმედის ეთერში.

მისივე თქმით, დღევანდელი ეპიდემიოლოგიური ვითარების მიზეზი ის არის, რომ ხალხი რეკომენდაციებს არ ითვალისწინებდა.

"სტატისტიკის მიზეზი, რა თქმა უნდა, არის ის, რომ მიუხედავად არაერთი თხოვნისა, არაერთი გაფრთხილებისა და არაერთი რეკომენდაციისა, არ იქნა გათვალისწინებული და არ იყო დაცული ეს რეკომენდაციები და რა თქმა უნდა, ამის მოლოდინი ჯანდაცვის სფეროს ყველა წარმომადგენელს ჰქონდა, რომ თუ არ იქნებოდა გათვალისწინებული ჩვენი რეკომენდაციები და დაცული შესაბამისი ხარისხით ისინი, რა თქმა უნდა, ჩვენ მივიღებდით საკმაოდ მძიმე მეოთხე ტალღას და რეალურად დღეს ვდგავართ ამ ფაქტის წინაშე", — ამბობს მინისტრი.

დღეს, 10 აგვისტოს ეკონომიკის მინისტრმა, ნათია თურნავამ განაცხადა, რომ მობილობის შეზღუდვა არ განიხილება. მისი თქმით, ამ ეტაპზე დღის წესრიგში დგას უკვე არსებული აკრძალვების აღსრულება და არა ახალი რეგულაციების შემოღება.