საპატრიარქოს საზოგადოებასთან ურთიერთობის სამსახური ადასტურებს, რომ გუშინ, 6 აგვისტოს ბორჯომში მომხდარ მკვლელობაში ერთ-ერთი ბრალდებული სასულიერო პირია. თავდაპირველად, ეს ინფორმაცია მედიაში გავრცელდა.

საპატრიარქოში ამბობენ, რომ ბერი ანტონ მაისურაძე მათთან აღარ მსახურობს და ის უკვე იყო დაბარებული გამოკითხვაზე.

"ჩვენთვის ცნობილი გახდა, რომ გუშინ ბორჯომში მომხდარ მკვლელობასთან დაკავშირებით ერთ-ერთი ბრალდებულია ერთ დროს წალკის მამათა მონასტრის ბერი ანტონი (მაისურაძე). იგი წალკის სოფელ ბერთას მამათა მონასტერში 2008 წლიდან მსახურობდა, თუმცა რამდენიმე წელია თვითნებურად დატოვა მონასტერი და ცხოვრობდა შინ", — ვკითხულობთ საპატრიარქოს განცხადებაში.

განცხადების თავდაპირველ ვერსიაში საპატრიარქოს არ ეწერა, რომ ბერი მონასტერში აღარ მსახურობს. მათ პოსტში ცვლილება მოგვიანებით შიეტანეს.

აღსანიშნია, რომ შინაგან საქმეთა სამინისტროს გავრცელებულ განცხადებაში დაკავებულის ინიციალები ემთხვევა აღნიშნული ბერის სახელსა და გვარს. უწყებაში ამბობენ:

"შინაგან საქმეთა სამინისტროს სამცხე-ჯავახეთის პოლიციის დეპარტამენტის თანამშრომლებმა, ცხელ კვალზე ჩატარებული ოპერატიული და საგამოძიებო მოქმედებების შედეგად, 1986 წელს დაბადებული ა.მ. განზრახ მკვლელობის ბრალდებით დააკავეს. დანაშაული 7-დან 15 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ მიმდინარე წლის 6 აგვისტოს, ბორჯომში, ინგოროყვას ქუჩაზე, ბრალდებულსა და 1984 წელს დაბადებულ, წარსულში მრავალჯერ ნასამართლევ ლ.ნ.-ს შორის მოხდა კონფლიქტი, რა დროსაც ლ.ნ.-მ ავტომატური ცეცხლსასროლი იარაღიდან რამდენჯერმე გაისროლა, ხოლო ბრალდებულმა მას ცივი იარაღით ჭრილობები მიაყენა. დაჭრილი მამაკაცი საავადმყოფოში მისვლის შემდეგ გარდაიცვალა".

იმის დასაზუსტებლად არის თუ არა ანტონ მაისურაძე ის პირი, რომელიც პოლიციამ დააკავა, On.ge საპატრიარქოს და შსს-ს დაუკავშირდა. უწყებაში დამატებით კითხვებზე არ გვიპასუხეს, საპატრიარქოს პრესსამსახურმა, ანდრია ჯაღმაიძემ კი მხოლოდ ის გვითხრა, რომ გამოძიება მიმდინარეობს და საქმის დეტალებს თავად არ იცნობს.