მთავარი არხის გენერალური დირექტორი, ნიკა გვარამიას თქმით, აქვს ინფორმაცია, რომ იგეგმება მისი ლიკვიდაცია. ის დღეს სახელმწიფო უსაფრთხოების სამსახურში გამოკითხვაზე იმყოფებოდა და როგორც ამბობს, უწყებას საკითხთან დაკავშირებით მის ხელთ არსებული ყველა ინფორმაცია მიაწოდა.

"ინფორმაცია ეხება, ჩემი ფიზიკური ლიკვიდაციის დაგეგმვას. ეს ასე ბევრჯერ უთქვამთ, მაგრამ, [ამჯერად] ზედმეტად დეტალური იყო იმისთვის, რომ ყურადღება არ მიმექცია [...] გულწრფელად გითხრათ, ახლაც დარწმუნებული ვარ, რომ დაშინების მცდელობაა, რაც ფუჭია, ან რაღაც პროვოკაცია, თუმცა იმდენად დეტალურია ეს ინფორმაცია, რომ დაშვება შესაძლებელია, რომ ეს სიმართლე იყოს", — განაცხადა ნიკა გვარამიამ.

ის ამბობს, რომ ეს ინფორმაცია 10 დღეზე მეტია რაც აქვს და სახელმწიფო უსაფრთხოების სამსახურს უცხოელი პარტნიორებისა და სახალხო დამცველის რჩევით მიმართა.

გვარამია არ ასახელებს ინფორმაციის წყაროს, თუმცა მიანიშნებს, რომ ამ საქმის უკან რუსეთი დგას.

"ორი რამის გამო მოვედი აქ. პირველი, სული ტკბილია და მნიშვნელოვანი არის ჩემთვის ცოცხალი ვიქნები თუ არა, მაგრამ, ასევე ძალიან დიდი მნიშვნელობის საკითხია ის, რომ თუ ჩემს წინააღმდეგ რამე მოხდა, ეს მნიშვნელოვან პრობლემებს გამოიწვევს ამ ქვეყანაში. ამაში სრულიად დარწმუნებული ვარ და ეს პრობლემები ხელსაყრელი იქნება მხოლოდ და მხოლოდ ერთი სახლემწიფოსთვის. ამ სახელმწიფოს ჰქვია რუსეთი და იმ ადამიანებისთვის, ვინც აქ რუსულ პოლიტიკას ატარებს. ამიტომ, ჩემთვის ეს როგორც პირადი საკითხია, ასევე მოქალაქეობრივი პასუხისმგებლობაა", — განაცხადა ნიკა გვარამიამ.

მან აღნიშნა ისიც, რომ სუს-ში სახელმწიფო დაცვით უზრუნველყოფა შესთავაზეს, თუმცა ამ წინადადებას ჯერჯერობით არ დათანხმებულა.

ნიკა გვარამია სუს-ში გუშინაც იმყოფებოდა. გამოკითხვის შემდეგ მან განაცხადა, რომ საქმე ეხება მის წინააღმდეგ დაგეგმილ "ტერორისტულ აქტს".