ქართული ოცნების აღმასრულებელი მდივანი, მამუკა მდინარაძე ამტკიცებს, რომ პრემიერმინისტრ ირაკლი ღარიბაშვილის ვიზიტები ბალტიის ქვეყნებში არ ჩაშლილა. მეტიც, მდინარაძე გარანტიას გვაძლევს, რომ მსგავსი რამე არც მოხდება.

მამუკა მდინარაძემ აღნიშნა, რომ საუბარი იყო "რაღაც შეხვედრებზე", თუმცა შეთანხმება არ ყოფილა.

"არცერთი შეხვედრა, რომელიც იყო დაგეგმილი — არათუ იმ კითხვასთან დაკავშირებით გპასუხობთ, ზოგადად — რომელიც იყო დაგგემილი და შეთანხმებული არ ჩაშლილა და არც ჩაიშლება, გარანტიას გაძლევთ.

მე არ მგონია, რომ თქვენ ეს ინფორმაცია გქონდეთ. მე უფრო მგონია, უფრო სწორად დარწმუნებული ვარ, რომ რადგან იყო რაღაც შეხვედრებზე საუბარი და მათთან დაკავშირებით შეთანხმება არ ყოფილა, ეს არის თქვენს ნიუსრუმში გამოგონილი ამბავი. სინამდვილეში, შეთანხმება შეხვედრასთან დაკავშირებით რომ ყოფილიყო, შეხვედრაც იქნებოდა. დანარჩენი ტყუილია", — აცხადებს მამუკა მდინარაძე.

რამდენიმე დღეა ქართულ მედია სივრცეში ვრცელდება ინფორმაცია, რომ საქართველოს პრემიერმინისტრის, ირაკლი ღარიბაშვილს ბალტიის ქვეყნებში 8-9 აგვისტოს დაგეგმილი ვიზიტები გაუუქმეს. ამის მიზეზად 5-6 ივლისის ძალადობრივი მოვლენების მონაწილეთა დაუსჯელობა და შარლ მიშელის შეთანხმების ანულირება სახელდება. საგარეო საქმეთა სამინისტროში აცხადებენ, რომ ეს ინფორმაციას "სრული სპეკულაციაა".