დეპუტატი პაატა მანჯგალაძე აცხადებს, რომ მიშელის დოკუმენტის ანულირება იმდენად დამაზიანებელი გადაწყვეტილება იყო, პრეზიდენტმაც კი ვერ გაამართლა ქართული ოცნების გადაწყვეტილება. მანჯგალაძის შეფასებით, პრეზიდენტს სწორი და მნიშვნელოვანი აქცენტები ჰქონდა.

"ობიექტურად უნდა ვთქვათ, რომ ბევრი სწორი გზავნილი იყო ნამდვილად. არ აქვს მნიშვნელობა ვის მოსწონს და ვის არ მოსწონს პრეზიდენტი. ბევრი მნიშვნელოვანი გზავნილი იყო, რაც კიდევ ერთხელ ადასტურებს იმას, რომ ქართულმა ოცნებამ იმდენად დამაზიანებელი გადაწყვეტილება მიიღო ამ შეთანხმებიდან გასვლის სურვილის განცხადებით, რომ პრეზიდენტმაც კი ვერ შეძლო ამის გამართლება", — განაცხადა პაატა მანჯგალაძემ.

მას შემდეგ, რაც სალომე ზურაბიშვილი მიშელის შეთანხმების ხელმომწერი პოლიტიკოსების ნაწილს შეხვდა, გუშინ, 3 აგვისტოს სპეციალური ბრიფინგი გამართა და განაცხადა, რომ ვერ აიღებს პასუხისმგებლობას ვერც დოკუმენტის ცალკეულ ელემენტებზე და ვერც მის ანულირებაზე. ზურაბიშვილმა, ასევე, აღნიშნა, რომ არ ეთანხმება ქართული ოცნების არგუმენტებს, რითაც ხსნიან დოკუმენტის ანულირება. პრეზიდენტმა განაცხადა, რომ როცა უცხოეთისგან პატივისცემას ვითხოვთ, თავადაც უნდა ვიმსახურებდეთ პატივისცემას, ამისთვის კი ნაკისრ ვალდებულებებს უნდა ვასრულებდეთ.

გაიგე მეტი: