გულის სიღრმეში ალბათ ყველას გვჯერა, რომ სადღაც, ოკეანის ფსკერის რომელიღაც კუთხეში ბიკინი ბოტომი ნამდვილად არსებობს, სადაც ჭკუამხიარული სპანჯბობი, ცოტა არ იყოს და ბოთე პატრიკი და თანამედროვე ზრდასრულის ჭეშმარიტი პროტოტიპი სქვიდვორდი იდილიურად ცხოვრობენ.

ჰოდა, თურმე ასეცაა — ოკეანის სიღრმეში კამერამ სპანჯბობისა და პატრიკის ნამდვილი მოდელები გადაიღო. ამერიკული კვლევითი ხომალდი, NOAAS Okeanos Explorer, ცოტა ხნის წინ ატლანტის ოკეანის სანაპიროდან 320 კილომეტრის მოშორებით იმყოფებოდა და 1 885 მეტრის სიღრმეზე ფსკერს იკვლევდა, როცა კამერის ობიექტივში ნაცნობი ფიგურები მოექცნენ.

ხომალდის თანამშრომელმა, ქრისტოფერ მამ, რა წამს თვალი მოკრა ფსკერზე ჩაძირულ ყვითელ ღრუბელს და ვარდისფერ ზღვის ვარსკვლავს, მაშინვე მეგობრების ცნობილი წყვილი გაახსენდა.

ფოტო: mwhdeere / Twitter

"როგორც წესი, ასეთი ასოციაციების თავიდან აცილებას ვცდილობ, მაგრამ გავოცდი", — წერს მა ტვიტერზე, — "ნამდვილი სპანჯბობი და პატრიკი!".

თუმცა, აქვე უნდა გამცნოთ სამწუხარო ფაქტი; მართალია, ანიმაციაში სპანჯბობი და პატრიკი დაამეგობრეს, მაგრამ რეალურ სამყაროში ისინი მტრები არიან — ზღვის ვარსკვლავები ღრუბლებს ჭამენ.

"სავარაუდოდ, გვერდიგვერდ იმიტომ არიან, რომ ღრუბელი მალე ზღვის ვარსკვლავის საკბილო გახდება, ნაწილობრივ მაინც", — ამბობს მა, — "რეალობა ანიმაციაში ნაჩვენებზე ცოტათი უფრო ულმობელია".