შინაგან საქმეთა სამინისტროს განცხადებით, ფორმულას ფოტოგრაფზე, ვახო ქარელზე თავდასხმის ბრალდებით, 2 მოძალადე დააკავეს. ისინი ქარელს 5 ივლისს ქაშუეთის ეკლესიის მიმდებარე ტერიტორიაზე თავს დაესხნენ და ფიზიკურად გაუსწორდნენ. დაშავებული ფოტოგრაფი რამდენიმე დღე საავადმყოფოში მკურნალობდა.

პროკურატურის ინფორმაციით, დაკავებულებს ბრალი ჟურნალისტური საქმიანობის გამო განხორციელებული დევნის, დისკრიმინაციის შემცველი სხვა ნიშნით შეუწყნარებლობის მოტივით პროფესიულ საქმიანობაში ხელის შეშლისა და შეუწყნარებლობის მოტივით ჯგუფურ ძალადობაში მონაწილეობის ფაქტებზე წარუდგინეს. უწყებაში ამბობენ, რომ მოძალადეები ქარელს ფიზიკური და სიტყვიერი შეურაცხყოფით პროფესიული საქმიანობის შეწყვეტას აიძულებდნენ, რათა მათ მიერ განხორციელებული აგრესიული ქმედებების გადაღება და გავრცელება ვერ მოეხერხებინა.

პროკურატურა ბრალდებულებისთვის აღკვეთის ღონისძიების სახით პატიმრობას მოითხოვს. მათ ბრალი სისხლის სამართლის კოდექსის 154-ე მუხლის მეორე ნაწილით, 156-ე მუხლის მე-2 ნაწილის "ა" ქვეპუნქტით და 225-ე მუხლის მეორე ნაწილით აქვთ წარდგენილი, რაც სასჯელის სახედ და ზომად 4-დან 6 წლამდე თავისუფლების აღკვეთას ითვალისწინებს.

5-6 ივლისს გამართული აქციების დროს დაშავდა მედიის 53 წარმომადგენელი შსს-ს განცხადებით, ამ ეტაპზე ჟურნალისტისთვის პროფესიულ საქმიანობაში ძალადობის მუქარით, უკანონოდ ხელის შეშლის, ძალადობითა და ძალადობის მუქარით დევნის, ასევე, ჯგუფური ძალადობის ფაქტებზე სულ დაკავებულია 31 პირი.