რესპუბლიკური პარტიის ლიდერის, ხათუნა სამნიძის თქმით, საქართველოს ხელისუფლებაში არის ისეთი ძალა, რომელსაც სჭირდება ტოტალური კონტროლი თავის გუნდის წევრების და ამისთვის ის მახინჯ პრაქტიკას იყენებს.

"კი, ისევ გვისმენენ. ერთი წუთითაც არ დაავიწყდებოდა არავის, დარწმუნებული ვარ, არცერთ მოქალაქეს, რომ ხელისუფლებაში არის ისეთი ძალა, რომელსაც სჭირდება ტოტალური კონტროლი საკუთარივე გუნდის წევრების და ამისთვის ის იყენებს იმ მახინჯ პრაქტიკას, რომელიც არაერთხელ გამოუყენებია ხელისუფლებას ამ ქვეყანაში", — ამბობს ის.

სამნიძე აცხადებს, რომ ქართულმა ოცნებამ ყველა ის დანაშაულებრივი მეთოდი გამოიყენა, რის აღმოსაფხვრელადაც ამბობდა, რომ მოვიდა ხელისუფლებაში.

"ქართულმა ოცნებამ ყველა ის სიმახინჯე, ყველა ის დანაშაულებრივი მეთოდი, ინსტრუმენტი, რის გამოც ამბობდა, რომ უნდა მოსულიყო ხელისუფლებაში, რომ აღარ ყოფილიყო ამ ქვეყანაში გამოყენებული, ყველა ეს მეთოდი გამოიყენა უკვე საკუთრი ძალაუფლების შესანარჩუნებლად. ერთადერთი რამის თქმა შემიძლია, გადახედონ უახლოეს წარსულს, როგორ ამთავრებს ძალა, ხელისუფლებაში მყოფი, რომლის მთავარი და ერთადერთი მიზანი ხდება მხოლოდ ხელისუფლების შენარჩუნება და ამის გამო ადამიანების წინააღმდეგ სიარული", — განაცხადა მან.

გაიგე მეტი:

მთავარი არხის დირექტორმა ნიკა გვარამიამ განაცხადა, რომ მოიპოვა სახელმწიფო უსაფრთხოების სამსახურის დოკუმენტები, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული. სავარაუდოდ, სუს-ის ჩანაწერებიდან, ირკვევა, რომ უწყებაში აქვთ ინფორმაცია ხსნებული საზოგადოებაში აქტიური პირების სექსუალური ორიენტაციის, პირადი ცხოვრების, სექსუალური პარტნიორების შესახებ და ეს ყველაფერი აღწერილია უწყების დოკუმენტში. ისევე, როგორც ჟურნალისტების სატელეფონო ზარები სხვადასხვა უწყებების პრესსამსახურებთან. გვარამია ამბობს, რომ ეს ჩანაწერები ქართული ოცნების დამფუძნებლის, ბიძინა ივანიშვილისთვის კეთდება და პროცესში სუს-ის უფროსები არიან ჩართული.

On.ge დაუკავშირდა სახელმწიფო უსაფრთხოების სამსახურს იმის გასარკვევად, რა რეაგირება ექნებათ ამ ინფორმაციაზე. უწყებაში თქვეს, რომ ამ საკითხზე კომენტარს არ გააკეთებენ.

ამასთან, საერთაშორისო გამჭვირვალობა — საქართველოს დირექტორის მოადგილე, გიორგი ონიანი, GDI-ს დამფუძნებელი, გიორგი მშვენიერაძე და სოციალური სამართლიანობის ცენტრის წარმომადგენელი, გურო იმნაძე ადასტურებენ, რომ გვარამიას გამოქვეყნებულ ჩანაწერებში აღწერილი დიალოგი შედგა.