"აბსოლუტური სისულელეა" — ასე მოიხსენიებს ქართული ოცნების დეპუტატი, ალუდა ღუდუშაური ნიკა გვარამიას მიერ გასაჯაროებულ, სავარაუდოდ, სუს-ის ჩანაწერებს და ჟურნალისტებს ირონიულად ეკითხება: "საიდან მოგაქვთ ეს სისულელეები".

"დამშვიდდით, დამშვიდდით. ნიკა გვარამიამ ხომ გითხრათ, რომ უბრუნდებით ჟურნალისტიკას, თუმცა რადიკალურსო, ხომ გითხრათ" — ამბობს ის საკითხის შეფასების ნაცვლად.

მას შემდეგ, რაც ჟურნალისტმა აღნიშნა, რომ ჩანაწერების შინაარსი არასამთავრობო ორგანიზაციების წარმომადგენლებმა დაადასტურეს, ღუდუშაურმა თქვა:

"ვერ გამოდიხართ ხომ ნაციონალური მოძრაობის რეჟიმის დროიდან. რა მასალებზე [უნდა დაიწყოს გამოძიება]? იჯდა გვარამია და დემაგოგიას, რაღაცეებს კითხულობდა... [NGO-ს წევრები, ვინც დაადასტურა შინაარსი] ყველა არიან აფილირებული ან პირდაპირი წევრები ნაციონალურ მოძრაობის".

მთავარი არხის დირექტორმა ნიკა გვარამიამ განაცხადა, რომ მოიპოვა სახელმწიფო უსაფრთხოების სამსახურის დოკუმენტები, სადაც პოლიტიკოსებზე, სასულიერო პირებზე, ჟურნალისტებზე, ბიზნესმენებზე, საჯარო მოხელეებზე თვალთვალია ასახული. სავარაუდოდ, სუს-ის ჩანაწერებიდან, ირკვევა, რომ უწყებაში აქვთ ინფორმაცია ხსნებული საზოგადოებაში აქტიური პირების სექსუალური ორიენტაციის, პირადი ცხოვრების, სექსუალური პარტნიორების შესახებ და ეს ყველაფერი აღწერილია უწყების დოკუმენტში. ისევე, როგორც ჟურნალისტების სატელეფონო ზარები სხვადასხვა უწყებების პრესსამსახურებთან. გვარამია ამბობს, რომ ეს ჩანაწერები ქართული ოცნების დამფუძნებლის, ბიძინა ივანიშვილისთვის კეთდება და პროცესში სუს-ის უფროსები არიან ჩართული.

On.ge დაუკავშირდა სახელმწიფო უსაფრთხოების სამსახურს იმის გასარკვევად, რა რეაგირება ექნებათ ამ ინფორმაციაზე. უწყებაში თქვეს, რომ ამ საკითხზე კომენტარს არ გააკეთებენ.

ამასთან, საერთაშორისო გამჭვირვალობა — საქართველოს დირექტორის მოადგილე, გიორგი ონიანი, GDI-ს დამფუძნებელი, გიორგი მშვენიერაძე და სოციალური სამართლიანობის ცენტრის წარმომადგენელი, გურო იმნაძე ადასტურებენ, რომ გვარამიას გამოქვეყნებულ ჩანაწერებში აღწერილი დიალოგი შედგა.