ქართული ოცნების თავმჯდომარე, ირაკლი კობახიძე აცხადებს, რომ რიგგარეშე არჩევნების დანიშვნა თვითმმართველობის არჩევნების შედეგებზე "არავითარი ფორმით არ იქნება დამოკიდებული".

"ადგილობრივ თვითმმართველობის არჩევნების შედეგებს არ ექნება არავითარი მნიშვნელობა — რომც ავიღოთ 3%, ლელოსავით, მაინც არ დაინიშნება რიგგარეშე საპარლამენტო არჩევნები, 93% რომ ავიღოთ, მაინც არ დაინიშნება", — თქვა კობახიძემ.

მისივე თქმით, თუ დაინახავენ, რომ "ვითარება არის მომწიფებული" ჯანსაღი კოალიციური მთავრობისთვის, ამ შემთხვევაში "ყველაფრისგან დამოუკიდებლად" და "კეთილი ნებით" მიიღებენ რიგგარეშე არჩევნების ჩატარების გადაწყვეტილებას.

ჟურნალისტების კითხვას, რას გულისხმობს "მომწიფებაში", კობახიძე პასუხობს, რომ ნებისმიერ ქვეყანაში ტრადიციული პარტიებისგან მიჯნავენ არატრადიციულ პარტიებს, რომლებთანაც გამორიცხავენ კოალიციის შექმნას, რადგან არსებობს "პრინციპული და ღირებულებითი" შეუთავსებლობა. მისივე განმარტებით, კოალიციური მმართველობის დამტკიცება შესაძლებელი გახდება მას შემდეგ, როცა ღირებულებითი შეუთავსებლობის პრობლემა აღარ იქნება. თუმცა იქვე აღნიშნა, რომ ნაციონალურ მოძრაობასთან ღირებულებითი შეუთავსებლობა მომავალშიც არ აღმოიფხვრება და ასეთი კოალიცია მომავალშიც წარმოუდგენელია.

"ჩვენ შემთხვევაშიც არის იგივე პრობლემა — გვაქვს ღირებულებითი შეუთავსებლობა კონკრეტულ პარტიებთან, გვაქვს პრინციპული შეუთავსებლობა და არამარტო ჩვენ, ჩვენს მხარდამჭერებს, ჩვენს მილიონ მხარდამჭერს აქვს ეს ღირებულებითი და პრინციპული შეუთავსებლობა. როგორც კი ჩვენ დავინახავთ, მათ შორის, ოპოზიციის ქმედებებიდან გამომდინარე, რომ ეს ზღვარი იშლება და ღირებულებითი შეუთავსებლობის პრობლემა აღარ არსებობს მთელ რიგ პოლიტიკურ პარტიებს შორის, ამის შემდეგ უკვე გახდება შესაძლებელი კოალიციური მმართველობის დამკვიდრება", — განაცხადა კობახიძემ.

ჟურნალისტებმა მას ჰკითხეს გახარიას პარტიასთან თანამშრომლობაზეც, რაზეც ასე უპასუხა:

"არსებობს პოლიტიკაში თუ ზოგადად პოლიტიკაში მაგალითები, როდესაც მტერთანაც გარიგდებიან ხოლმე, მაგრამ არავინ არ რიგდება მოღალატესთან. აქედან გამომდინარე, ეს გამორიცხულია".

28 ივლისს ქართულმა ოცნებამ განაცხადა, რომ შარლ მიშელის შეთანხმება ანულირებულია. პარტიის თავმჯდომარის, ირაკლი კობახიძის თქმით, შეთანხმებას მხოლოდ თავად ასრულებენ, რაც არასწორად მიაჩნიათ. მან ოპოზიციას დააბრალა შეთანხმების არშესრულება. ამასთან, მისივე თქმით, ქართული ოცნება უარს ამბობს აქამდე დაპირებულ 43%-იან ბარიერზე და აცხადებს, რომ ახალი არჩევნები მათი "კეთილი ნებით" 53%-ის მიღების შემთხვევაშიც ჩატარდება, თუ გადაწყვეტენ, რომ ოპოზიცია მზად არის კოალიციური მმართველობისთვის.

გაიგეთ მეტი: