ნატოს გენერალური მდივნის სპეციალური წარმომადგენელი კავკასიასა და ცენტრალურ აზიაში, ჯეიმს აპატურაი მიიჩნევს, რომ ქართული ოცნების გადაწყვეტილება შარლ მიშელის დოკუმენტის ანულირების შესახებ უკიდურესად სამწუხაროა. აპატურაი ამბობს, რომ ეს დოკუმენტი საუკეთესო გზაა საქართველოს წინსვლისა და ევროპეიზაციისთვის.

"ქართული ოცნების გადაწყვეტილება, დატოვოს 19 აპრილის შეთანხმება ძალიან სამწუხაროა. 19 აპრილის შეთანხმება საუკეთესო გზაა იმ რეფორმების განსახორციელებლად, რომლებიც ხელს შეუწყობს საქართველოს წინსვლას და დაეხმარება მას ევროატლანტიკურ გზაზე.

სწორედ ამიტომ, საქართველომ შეთანხმების განხორციელების საკითხი შეიტანა თავის ყოველწლიურ ეროვნულ პროგრამაში, რაც საბოლოოდ დაეხმარება ქვეყანას ნატო-ში გასაწევრიანებლად მზადებაში. ყველა პარტიამ, მათ შორის "ნაციონალურმა მოძრაობამ", უნდა მიიღოს და მხარი დაუჭიროს იმ რეფორმების განხორციელებას, რომლებიც აუცილებელია საქართველოს დემოკრატიული მიზნების მისაღწევად", — წერს აპატურაი.

28 ივლისს ქართულმა ოცნებამ განაცხადა, რომ შარლ მიშელის შეთანხმება ანულირებულია. პარტიის თავმჯდომარის, ირაკლი კობახიძის თქმით, შეთანხმებას მხოლოდ თავად ასრულებენ, რაც არასწორად მიაჩნიათ. მან ოპოზიციას დააბრალა შეთანხმების არშესრულება. ამასთან, მისივე თქმით, ქართული ოცნება უარს ამბობს აქამდე დაპირებულ 43%-იან ბარიერზე და აცხადებს, რომ ახალი არჩევნები მათი "კეთილი ნებით" 53%-ის მიღების შემთხვევაშიც ჩატარდება, თუ გადაწყვეტენ, რომ ოპოზიცია მზად არის კოალიციური მმართველობისთვის.