ბათუმში სტიქიის შედეგებს ებრძვიან — დატბორილია გზები, ქუჩები, საცხოვრებელი სახლების პირველი სართულები და სარდაფები. მერიის ინფორმაციით, ცხელ ხაზზე დაფიქსირებულია 100-ზე მეტი შეტყობინება. მათივე განცხადებით, ბათუმის წყალი ამოტუმბვით სამუშაოებს ახორციელებს.

როგორც მერიაში ამბობენ, სტიქიის შედეგად, გონიო-კვარიათისა და კახაბრის ადმინისტრაციულ ერთეულებში განვითარდა მეწყრული პროცესები. ადგილზე მობილიზებულნი არიან შინაგან საქმეთა სამინისტროს შესაბამისი სამსახურები.

მერიის განცხადებით, სანიაღვრე წყლების დროულად გადინების მიზნით იწმინდება სანიაღვრე ჭები და ზღვაში გამსვლელი არხები. მათივე განცხადებით, დაზარალებულების მდგომარეობას შეისწავლიან და შესაბამისი დახმარება კომისიური წესით განხორციელდება.