ტორესა მოსის შემდეგ ლიტერატურული პრემია ლიტერას კიდევ ერთმა მონაწილემ მოხსნა საკუთარი რომანი კონკურსიდან. მათე სარალიშვილი დებიუტანტი მწერალია, რომლის წიგნიც, მივიწყებულნი სადებიუტო რომანების ნომინაციაში შევიდა. ლიტერა 2020-ის მონაწილეთა გრძელი სია გუშინ გამოქვეყნდა.

მათე სარალიშვილმმ საკუთარი გადაწყვეტილება გამომცემლობასთან შეთანხმების შემდეგ გააჟღერა და კონკურსიდან წიგნის მოხსნა კულტურის სამინისტროს უკავშირდება. მისი თქმით, წიგნის წერის დროს განცდილი და გადმოცემული ტკივილი სწორედ კულტურის სამინისტროს და თეა წულუკიანის მსგავსი ადამიანების დამსახურებაა:

"ვისაც მივიწყებულნი წაუკითხავს, მიხვდება, რატომ ვტოვებ კონკურსს. მივიწყებულნი 19 წლისამ დავწერე და 21 წლისამ გამოვეცი. წერის დროს დაგროვილი და გამოხატული ტკივილი ზუსტად ამ პროექტის მაორგანიზებელი ორგანოს, მსგავსი მიდგომის მქონე უკულტურო და ახალგაზრდების წინააღმდეგ მოქმედი პირების ბრალია. ჩემს წიგნს ვერ ვუღალატებ".

ახალგაზრდა მწერალი დასძენს, რომ მისთვის "ახლა ყოველი ნაბიჯი ძვირფასია და ფასეული" და სიიდან საკუთარ რომანს შლის.

გუშინ ლიტერას კონკურსიდან საკუთარი წიგნი, ორდროშობანა მოხსნა ტორესა მოსიმაც. მან კულტურის სამინისტროს ბოიკოტი ჯერ კიდევ 22 ივლისს გამოუცხადა, როდესაც კულტურის მინისტრმა თეა წულუკიანმა მთავარი არხის ჟურნალისტს ემა გოგოხიას მიკროფონი სენაკის თეატრში წაართვა და შეურაცხყოფა მიაყენა. უხეშად წართმევის შემდეგ, მინისტრმა მთავარი არხის მიკროფონით დაიწყო საუბარი და ბიძინა ივანიშვილს მადლობა გადაუხადა. წულუკიანი ჟურნალისტს უთხრა: "ემა, მოდი, აბა თქვი, ბიძინას გაუმარ...". მანვე Facebook-ზე გამოაქვეყნა ფოტო და დაწერა, რომ ამიერიდან გაკეთებული საქმეების შესახებ ამ მიკროფონით უნდა "გვაუწყოს". მინისტრის აზრით, ამ საქციელით ჟურნალისტი განაიარაღა.

ტორესა მოსის სიტყვებით, სანამ კულტურის მინისტრი თეა წულუკიანია, ის უწყებას ბოიკოტს უცხადებს.

"კულტურის უკულტურო მინისტრი. შეგახსენებთ, რომ ამ ადამიანის კულტურის მინისტრად დანიშვნის დღიდან მე შევწყვიტე კულტურის სამინისტროს მიერ დაფინანსებულ ყველა პროექტთან თანამშრომლობა პრემიებისა და მთარგმნელობითი პროგრამის ჩათვლით", — განაცხადა 22 ივლისს ტორესა მოსიმ.

ლიტერას კონკურსის შედეგებს ჟიურის 5 წევრი შეაფასებს, რომელიც კულტურის სამინისტროსა და მწერალთა სახლის მიერაა შერჩეული. ლიტერატურული პრემიის გამარჯვებულების ვინაობა ფარული კენჭისყრის შემდეგ გახდება ცნობილი. ლიტერატურული პრემიის საპრიზო ფონდი 30 000 ლარია, ხოლო 6 ნომინაციიდან თითოეულში გამარჯვებული ფულად პრემიას, 5 000 ლარს, მიიღებს.

პრემია ლიტერა განათლების, მეცნიერების, კულტურისა და სპორტის სამინისტრომ და მწერალთა სახლმა 2015 წელს დაარსეს და მას შემდეგ ყოველწლიურად გაიცემა 6 ნომინაციაში:

  1. წლის საუკეთესო პროზაული კრებული;
  2. წლის საუკეთესო რომანი;
  3. წლის საუკეთესო პოეტური კრებული;
  4. წლის საუკეთესო დოკუმენტური პროზა;
  5. წლის საუკეთესო წიგნის დიზაინი;
  6. წლის საუკეთესო დებიუტი.

კონკურსანტების მოკლე სიას ჟიური ნოემბრის დასაწყისში წარადგენს, გამარჯვებულების დაჯილდოების ცერემონია კი 2021 წლის დეკემბერში გაიმართება.