ჭყონდიდის მიტროპოლიტმა პეტრემ სინოდის სხდომაზე, საპატრიარქოში შესვლამდე ჟურნალისტებთან მოკლე კომენტარი გააკეთა. მისი თქმით, წინასწარ უცნობია თუ ზუსტად რა საკითხებს განიხილავენ, თუმცა გაგრძელდება მის მიერ წამოწყებული საუბარი, საპატრიარქოს ირგვლივ განვითარებულ მოვლენებზე:

"შემიძლია ვივარაუდო, რომ საერო სიმართლისაგან განსხვავებით, საეკლესიო სამართალი არ იქნება მიკერძოებული. მე მომხრე ვარ, რომ საეკლესიო სამართალი ამუშავდეს და დადგეს ყველა დასასჯელის საკითხი, რა თქმა უნდა, ჩემით უნდა დაიწყოს".

მიტროპოლიტმა გუშინ პროკურატურის მიერ გავრცელებულ ჩანაწერზეც ისაუბრა და თქვა, რომ დარწმუნებულია გიორგი მამალაძის უდანაშაულობაში:

"ამ ჩანაწერებმა კიდევ ერთხელ დაგვანახა თუ რა არასახარბიელო გარემოცვაა საპატრიარქოს წიაღში. მამა გიორგი რომ არავის მოსაწამლად არ მიდიოდა, ამაში დარწმუნებული ვარ".

საპატრიარქოში სინოდის წევრები იკრიბებიან. სხდომა ზუსტად 12 საათზეა ჩანიშნული.