ნახევარი მილიონი დოზა ფაიზერის ვაქცინა საქართველოშია. თვითმფრინავი თბილისში ახლახანს დაეშვა. ვაქცინას საქართველოში ჯანდაცვის მინისტრი, ეკატერინე ტიკარაძე და ამერიკის შეერთებული შტატების ელჩი, კელი დეგნანი დახვდნენ.

"მე მოვუწოდებ ყველას, ვისაც ეკუთვნის ვაქცინის გაკეთება საქართველოში, გთხოვთ, აიცერით, რაც შეიძლება სწრაფად, ვინაიდან ეს არის თქვენი და თქვენი საყვარელი ადამიანების საუკეთესო დაცვა. ეს, ასევე, ერთადერთი საშუალებაა იმისთვის, რომ ეკონომიკა აღდგეს", — განაცხადა კელი დეგნანმა.

ჯანდაცვის მინისტრმა ეს ამერიკის შეერთებული შტატების მხრიდან პანდემიის მართვის პერიოდში უპრეცენდენტო და ყველაზე მნიშვნელოვან დახმარებად შეაფასა.

საქართველოში Pfizer-ის ვაქცინის 28 000 დოზა 14 ივლისს შემოვიდა. ამ დროისთვის Pfizer-ის ვაქცინის გაკეთება შესაძლებელია მოქალაქეებისთვის 18 წლის ასაკიდან. თუმცა, მინისტრის ბრძანების თანახმად, Pfizer-ის შემდეგი პარტიის მიღების შემდეგ, აცრა 16 წლიდან იქნება შესაძლებელი.

როგორც ჯანდაცვის სამნისტროში განმარტავენ, უსაფრთხოების მიზნით Pfizer-ისა და AstraZeneca-ს ვაქცინის გაკეთება მხოლოდ კლინიკებშია შესაძლებელი, განსხვავებით Sinopharm-ისა და Sinovac-სგან, რომლებით აცრაც დამატებით მოწყობილ ვაქცინაციის ცენტრებშიც მიმდინარეობს.

Pfizer-ის პირველ და მეორე დოზას შორის შუალედი 21-28 დღეა. იგი გერმანულ კომპანია ბიონტექთან ერთად შეიქმნა და კორონავირუსის საწინააღმდეგო ერთ-ერთი პირველი ვაქცინაა, რომელიც ჯანდაცვის მსოფლიო ორგანიზაციამ აღიარა.