კორპორაციული სოციალური პასუხისმგებლობის ფარგლებში, საქართველოს ბანკი განათლების ხელშეწყობის მიზნით პროექტების მხარდაჭერას განაგრძობს. ამჯერად, ბანკის უშუალო ჩართულობით, წარმატებით დასრულდა წიგნების თაროს სკოლის მორიგი 6 კვირიანი სასწავლო კურსი. ინიციატივის ფარგლებში ქვეყნის მასშტაბით 200-ზე მეტმა მოსწავლემ მიიღო განათლება და 40-მდე ახალგაზრდა დასაქმდა.

წიგნების თაროს სკოლა დაწყებითი კლასის მოსწავლეებისთვის შექმნილი არაფორმალური განათლების სივრცეა, სადაც მიწვეულ პედაგოგებთან ერთად მასწავლებლის როლს სტუდენტები ითავსებენ. სკოლაში სწავლება ეფუძნება პრინციპს "შემეცნება გართობით", რაც სწავლის პროცესს ინოვაციურს, სახალისოს და საინტერესოს ხდის.

წიგნების თაროს ონლაინ სკოლის მთავარ მიზანს თანამედროვე მეთოდების გამოყენებით მოსწავლეებში განათლების მიმართ ინტერესის გაღვივება წარმოადგენს. სწავლება ონლაინ, Zoom-ის საშუალებით ხორციელდება, რაც მსურველებს საგანმანათლებლო პროცესში ჩართვის შესაძლებლობას ნებისმიერი ადგილიდან აძლევს. მასწავლებლებსა და მოსწავლეებს შორის მცირე ასაკობრივი ზღვარი კი საგაკვეთილო პროცესს კიდევ უფრო უშუალოს და მეგობრულს ხდის.

ამასთან, კორპორაციული სოციალური პასუხისმგებლობის ფარგლებში, საქართველოს ბანკმა გასულ წელს ოთხ სკოლაში — თბილისში, ფოთში, დიცსა და ხურვალეთში მულტიფუნქციური საგანმანათლებლო სივრცეები, იდეათეკები მოაწყო. წიგნების თაროს სკოლასთან პარტნიორობით კი სწორედ ამ ოთხი სკოლის 1-4 კლასის მოსწავლეებს მიეცათ შესაძლებლობა, სრულიად უფასოდ ჩართულიყვნენ ისეთ საინტერესო კურსებში, როგორებიცაა: მსოფლიო ლიტერატურა; მითოლოგია და ცივილიზაცია; დედამიწა და კოსმოსი; ადამიანი და ჯანმრთელობა.

"საქართველოს ბანკსა და წიგნების თაროს სკოლას შორის პარტნიორობა უკვე მეორე წელია წარმატებით გრძელდება. სკოლის დევიზია "ახალგაზრდები ბავშვების მომავლისთვის", რაც კიდევ ერთხელ უსვამს ხაზს სკოლის ინოვაციურ ხასიათს, ვინაიდან მასწავლებლის როლს პროექტ "წიგნების თაროში" გამორჩეული სტუდენტები და მოსწავლეები ირგებენ. პანდემიის დროს პროექტს დამატებითი ფუნქცია და მნიშვნელობა მიენიჭა, რადგან წიგნების თაროს სკოლის სახალისო ონლაინ გაკვეთილებმა მთელი ქვეყნის მასშტაბით მისცა ბავშვებს მათზე მორგებული, არაფორმალური განათლების მიღების შესაძლებლობა. საქართველოს ბანკისთვის განსაკუთრებით მნიშვნელოვანია სტუდენტებისა და მოსწავლეების ხელშეწყობა. შესაბამისად, ჩვენ აქტიურად ვაგრძელებთ მათ მხარდაჭერას როგორც სპეციალურად მათ საჭიროებებზე მორგებული საბანკო პროდუქტებით (sCool Card, სტუდენტური ბარათი), ასევე სხვადასხვა საგანმანათლებლო და შემეცნებითი პროექტებით", — განაცხადა თამარ გოჩაშვილმა, საქართველოს ბანკის CSR მიმართულების ხელმძღვანელმა.

აღსანიშნავია, რომ წიგნების თაროს სკოლა 2020 წელს დაარსდა და ის მსურველებს ისეთ საინტერესო კურსებს სთავაზობს, როგორებიცაა: ლოგიკური აზროვნება და მათემატიკური თავსატეხები; შემოქმედებითი აზროვნება და ესთეტიკის აღქმა; მითოლოგია და ცივილიზაციები; დედამიწა და კოსმოსი; რიტორიკული აზროვნება და საუბრის ხელოვნება; ადამიანი და ჯანმრთელობა. სკოლის მიერ მიწვეულ მასწავლებლებს შორის კი ყველასათვის ცნობილი ადამიანები — ლევან გიგინეიშვილი, გიორგი ბაქრაძე, მაია ცირამუა, ზალიკო სულაკაური, გიორგი კეკელიძე, ბაია დვალიშვილი და სხვანი არიან.