საქსტატის ინფორმაციით, ივნისში საქართველოდან უცხოეთში ექსპორტზე 349 მილიონი დოლარის ღირებულების საქონელი გავიდა, საიდანაც 17,5% ($61 მლნ) რუსეთზე მოდიოდა — ეს ნიშნავს იმას, რომ ივნისის თვეში საქართველოსთვის მთავარი საექსპორტო ბაზარი რუსეთი იყო.

ასეთია იმ 10 სასაქონლო ჯგუფის ჩამონათვალი, რომელიც ივნისის თვეში რუსეთში გავყიდეთ:

  1. ფეროშენადნობები — $17,8 მლნ;
  2. ყურძნის ნატურალური ღვინოები — $12,1 მლნ;
  3. მინერალური და მტკნარი წყლები — $6,2 მლნ;
  4. კარტოფილი, ახალი ან შეყინული — $3,4 მლნ;
  5. [ხილის] სხვა ნაყოფები — $3 მლნ;
  6. გარგარი, ალუბალი და ბალი, ატამი, ქლიავი და ღოღნოშო — $2,8 მლნ;
  7. წყლები, მინერალურისა და დაგაზიანებულის ჩათვლით, შაქრის დანამატების შემცველობით — $2,7 მლნ;
  8. ეთილის სპირტი არადენატურირებული და სპირტიანი სასმელები — $2,7 მლნ;
  9. მსუბუქი ავტომობილები — $1,6 მლნ;
  10. პომიდორი, ახალი ან შეყინული — $1,3 მლნ;

მიმდინარე წლის 6 თვის მდგომარეობით, რუსეთი საქართველოსთვის ერთ-ერთი მთავარი სავაჭრო პარტნიორი ქვეყანაა. იანვარ-ივნისში რუსეთისგან 466 მილიონი დოლარის საქონელი ვიყიდეთ, ხოლო ექსპორტის მოცულობამ 264 მილიონი დოლარი შეადგინა.

2021 წლის პირველი ნახევრის მონაცემებით, სავაჭრო ბრუნვის, ანუ ექსპორტისა და იმპორტის ჯამის მიხედვით, საქართველოს სავაჭრო პარტნიორებს შორის რუსეთი მხოლოდ თურქეთს ჩამორჩება.

რუსეთი საქართველოს მთავარ სავაჭრო პარტნიორებს შორის ბოლო წლებლში დაბრუნდა. თუ 2012 წლისთვის რუსეთის წილი მთლიან სავაჭრო ბრუნვაში 5% იყო, 2020 წელს ამ მაჩვენებელმა 11,7%-ს მიაღწია.