კრემლმა დასავლეთი გააფრთხილა, რომ ირანში რეჟიმის შეცვლის მცდელობა ან ქვეყნის უმაღლესი ლიდერის ლიკვიდაცია "პანდორას ყუთის გახსნას" გამოიწვევს და გლობალურ საფრთხეს შექმნის. ამის შესახებ ინფორმაციას Sky News ავრცელებს.

Sky News-თან იშვიათ ინტერვიუში, კრემლის პრესსპიკერმა დმიტრი პესკოვმა განაცხადა, რომ რუსეთი "ძალიან ნეგატიურად" იმოქმედებს, თუ ირანსა და ისრაელს შორის არსებული დაძაბულობის ფონზე, აიათოლა ალი ხამენეი მოკვდება.

მისი სიტყვები აშშ-ის პრეზიდენტ დონალდ ტრამპის კომენტარს მოჰყვა, რომელმაც სოციალურ მედიაში ხამენეის ლიკვიდაციის საკითხთან დაკავშირებით დაწერა და განაცხადა, რომ ორ კვირაში გადაწყვეტს, შეუერთდება თუ არა ამერიკა ისრაელის სამხედრო კამპანიას თეირანის წინააღმდეგ.

"სიტუაცია უკიდურესად დაძაბულია და საფრთხეს წარმოადგენს არა მხოლოდ რეგიონისთვის, არამედ გლობალურადაც...დამატებითი ქვეყნების ჩართვა კონფლიქტში კიდევ უფრო საშიშია. ეს გამოიწვევს დაპირისპირების ახალ ტალღას და რეგიონში დაძაბულობის ესკალაციას," — თქვა პესკოვმა.

კრემლის პრესსპიკერმა ასევე აღნიშნა, რომ ირანში რეჟიმის შეცვლა "გაუგონარია" და მსგავსი რიტორიკა "მიუღებელი უნდა იყოს ყველასთვის."

მან არ დააზუსტა, როგორ იმოქმედებს რუსეთი ხამენეის სიკვდილის შემთხვევაში, მაგრამ თქვა, რომ ეს ქვეყანაში შიდა დაძაბულობას გამოიწვევს.

"ეს გააჩენს ექსტრემისტულ განწყობებს ირანში, და ვინც ამაზე ლაპარაკობს, უნდა იცოდეს — ისინი [ირანი] პანდორას ყუთს გახსნიან," — განაცხადა მან.

ცნობისთვის, რუსეთმა ირანთან ურთიერთობები მას შემდეგ გააღრმავა, რაც უკრაინაში ომი დაიწყო და იანვარში სტრატეგიულ პარტნიორობას ხელი მოაწერა.