შინაგან საქმეთა სამინისტროს მტკიცებით, დააკავეს პირი, რომელმაც 10 ივლისს, TV პირველის ოპერატორს, ლექსო ლაშქარავასა და მის თანმხლებ პირს ნარკოტიკული ნივთიერება, ჰეროინი მიჰყიდა.

"სამართალდამცველების მიერ საქმეზე არაერთი საგამოძიებო მოქმედება ჩატარდა: დაიკითხა ათეულობით მოწმე, ჩატარდა მათთან ამოცნობები, დათვალიერდა არაერთი ვიდეოჩანაწერი და მიღებულ იქნა შესაბამისი ექსპერტიზის დასკვნები. საქმეზე მოპოვებული მტკიცებულებების საფუძველზე, სამართალდამცავებმა ბრალდებული 17 ივლისს, ფონიჭალის დასახლებაში დააკავეს", — ვკითხულობთ უწყების მიერ გავრცელებულ განცხადებაში.

შსს-ს ინფორმაციით, ბრალდებულის პირადი ჩხრეკისას ნივთმტკიცებად ამოიღეს სარეალიზაციოდ გამზადებული, ოთხ შეკვრად დაფასოებული ნარკოტიკი. გარდა ამისა, საცხოვრებელ სახლში იპოვეს სამ შეკვრად დაფასოებული განსაკუთრებით დიდი ოდენობით ნარკოტიკი.

გამოძიება ნარკოტიკული საშუალების უკანონო შეძენა-შენახვა-გასაღების ფაქტზე მიმდინარეობს, საქართველოს სისლის სამართლის კოდექსის 260-ე მუხლის 1-ლი და მე-4 ნაწილებით. დანაშაული 8-დან 20 წლამდე ვადით, ან უვადოდ თავისუფლების აღკვეთას
ითვალისწინებს.

TV პირველის ოპერატორი, ლექსო ლაშქარავა 11 ივლისს გარდაიცვალა. ის ერთ-ერთია მედიის ათობით წარმომადგენელს შორის, რომელსაც 5 ივლისს ძალადობრივი კონტრაქციის მონაწილეები ფიზიკურად გაუსწორდნენ. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. იგი რამდენიმე დღე საავადმყოფოში იმყოფებოდა და შემდეგ სახლში გაეწერა.

მისი გარდაცვალებიდან მეორე დღესვე შინაგან საქმეთა სამინისტომ სპეციალური ბრიფინგი გამართა, სადაც თქვეს, რომ შუალედური ექსპერტიზის მიხედვით, გარდაცვალების მიზეზი შესაძლოა გამხდარიყო ზედოზირება. ამავე დღეს მათ გაავრცელეს ვიდეომასალა, სადაც, მათივე განმარტებით, ჩანს ლაშქარავას გადაადგილების მარშრუტი გარდაცვალების წინა დღეს, ანუ 10 ივლისს. უწყებაში ამბობენ, რომ გარდაცვალებამდე ერთი დღით ადრე ლაშქარავა ორჯერ მივიდა ფონიჭალის დასახლებაში.

ლექსო ლაშქარავას კოლეგებსა და ოჯახს ამ ვერსიის არ სჯერა. მათ საქმეში დამოუკიდებელი ექსპერტი ჩართეს და საქმის გამჭვირვალედ და ეფექტიანად გამოძიებას ითხოვენ.