პარლამენტის თავმჯდომარემ ირაკლი კობახიძემ რუსთავი 2-ის ეთერში, გადაცემა არჩევანში სტრასბურგის გადაწყვეტილება შეაფასა. ირაკლი კობახიძე აცხადებს რომ მმართველი გუნდი "მშვიდად დააკვირდება" პროცესებს, დაიცავს საქართველოსა და ინსტიტუციების , მათ შორის საერთო სასამართლოების პრესტიჟს:

"კონტექსტი არის შეცვლილი მას შემდეგ, რაც საქმემ გადაინაცვლა სტრასბურგის სასამართლოში. დღემდე, ამ საქმეს ერქვა ხალვაში ყარამანაშვილის წინააღმდეგ, დღეს უკვე საქმეს ჰქვია რუსთავი 2 საქართველოს წინააღმდეგ. დარწმუნებული ვარ, ამ დაპირისპირებაში გამარჯვებული გამოვა საქართველო, იმიტომ რომ სიმართლე არის საქართველოს მხარეს.

ძალიან მშვიდად ვუყურებდი იმ პროცესებს, რომელიც დაკავშირებულია რუსთავი 2-თან, ვგულისხმობ საერთო სასამართლოებში წარმართულ პროცესებს. ჩვენ ვაცხადებდით რომ ეს იყო კერძო სუბიექტებს შორის დავა და აქედან გამომდინარე, არ გვქონდა არანაირი ინტერესი, მათ შორის არც პოლიტიკური ინტერესი ამ საკითხთან მიმართებით. ასევე მშვიდად ვაგრძელებთ ამ პროცესების ყურებას, როდესაც საქმე გრძელდება სტრასბურგის სასამართლოში. სტრასბურგის სასამართლომ უდნა გადაწყვიტოს ამ შემთხვევაში, დაირღვა თუ არა რაიმე უფლება და იყო თუ არა სამართლიანი უზენაესი სასამართლოს გადაწყვეტილება".

სტრასბურგის ადამიანის უფლებათა ევროპულმა სასამართლომ, უზენაესი სასამართლოს გადაწყვეტილების აღსრულება, რუსთავი 2-ის საქმეზე, უვადოდ შეაჩერა.