TI-ის დაკვეთით კავკასიის კვლევითი რესურსების ცენტრმა საზოგადოებრივი აზრი გამოიკითხა, რომლის თანახმადაც, გამოკითხული მოსახლეობის 46% საზოგადოებრივ მაუწყებელს არ უყურებს.

შეკითხვაზე, ენდობა თუ არა აღნიშნულ მაუწყებელს მოსახლეობა, 21%-მა განაცხადა, რომ უფრო ენდობა ვიდრე არ ენდობა, 12% კი მთლიანად ენდობა. რესპოდენტთა მხოლოდ 8% აცხადებს, რომ არ ენდობა მაუწყებელს, ხოლო 9% უფრო არ ენდობა ვიდრე ენდობა.

რაც შეეხება საზოგადოებრივი მაუწყებლისადმი ნდობას განსახლების მიხედვით, ამ მხრივ სოფლად მცხოვრები ადამიანები ლიდერობენ. კერძოდ, საზოგადოებრივ მაუწყებელს სოფლის მაცხოვრებელთა 66%, ქალაქის მაცხოვრებელთა 59% და თბილისში მაცხოვებელთა 55% უცხადებს ნდობას.

კვლევის შეკითხვაზე, ეთანხმებით თუ არა, რომ საზოგადოებრივი მაუწყებლის საინფორმაციო სამსახური: აშუქებს თემებს, რომელიც ჩემნაირ ხალხს აინტერესებს - გამოკითხულთა 36% დადებითად პასუხობს. 28%-ს მიაჩნია, რომ მაუწყებლის საინფორმაციო სამსახური ემსახურება პოლიტიკური ჯგუფების ინტერესებს. 25% მოსაზრებით კი, საინფორმაციო სამსახური მიუკერძოებელია თემების გაშუქებისას.

რაც შეეხება საზოგადოებრივი მაუწყებლის ყურებადობას საცხოვრებელი ადგილის მიხედვით, დედაქალაქში მას 33%, ქალაქში 31%, ხოლო სოფელში 36% უყურებს. გარდა ამისა, დედაქალაქის მოსახლეობის 26%, ქალაქის 30% და სოფლის 44% საზოგადოებრივ მაუწყებელს საერთოდ არ უყურებს.

საზოგადოებრივ მაუწყებლის მაყურებელთა უმეტესობა 36-55 წლამდე ასაკობრივ ჯგუფშია. მათი პროცენტული რაოდენობა 40%-ია. რაც შეეხება სქესის მიხედვით მაყურებელთა დაყოფას, საზოგადოებრივი მაუწყებლის მაყურებელთა 52% მამაკაცია, ხოლო 48% ქალი.

ზოგადად, ჟურნალისტებს გამოკითხულთა 24% ენდობა, რაც 2013 წელს ჩატარებული ამავე კვლევის მონაცემეზე 5%-ით ნაკლებია, 2013 წელს გამოკითხულთა 29% კი მედიის წარმომადგენლებს სრულ ნდობას უცხადებდა.