მუსიკის მოყვარულთათვის მშვენიერი ამბავი გვაქვს: ქართველი პიანისტი სანდრო გეგეჭკორი ბარსელონაში გამართული მარია კანალსის პიანისტთა საერთაშორისო კონკურსის გამარჯვებულია.

კონკურსის ფინალში სანდრომ პორტუგალიისა და ჩინეთის წარმომადგენლები დაამარცხა. მან ჩაიკოვსკის პირველი საფორტეპიანო კონცერტი შეასრულა. აღსანიშნავია, რომ კონკურსში მთელი მსოფლიოდან 400 მუსიკოსი მონაწილეობდა. სანდრომ პირველი პრემია და €25 000-ის ოდენობით ფულადი ჯილდო მოიპოვა. პირველი პრემიის გარდა, სანდრომ მსმენელის სპეციალური პრიზიც მიიღო.

მარია კანალსის საერთაშორისო მუსიკალური კონკურსი 1954 წლიდან არსებობს და ის მსოფლიოს მასშტაბით ახალგაზრდა და ნიჭიერი შემსრულებლების აღმოჩენას ემსახურება.