დაავადებათა კონტროლისა და საზოგადოებრივი ჯანდაცვის ეროვნული ცენტრის ხელმძღვანელი, ამირან გამყრელიძის ინფორმაციით, უახლოეს მომავალშ ქვეყანაში Pfizer-ის დამატებითი დოზები შემოვა. კითხვაზე, ცნობილია თუ არა ვაქცინის შემოტანის ზუსტი თარიღი, გამყრელიძე ასე პასუხობს.

"რა თქმა უნდა, მე თარიღი ვიცი, მაგრამ, სანამ თვითმფრინავი არ დაჯდება ნამდვილად ვერ გეტყვით. მალე იქნება Pfizer-ის გარკვეული დოზები. რაც მთავარია, ეს იქნება პირველი პარტია, შემდეგ ამას მოჰყვება მეორე სწრაფად, მესამე და ჩვენ გვექნება, ჩვენი გათვლებით წელს, ოქტომბრის ბოლომდე სადღაც მილიონ-ნახევარი დოზა Pfizer-ი".

გამყრელიძე ამბობს, რომ ქვეყანა ემზადება Pfizer-ის დიდი რაოდენობის ადმინისტრირებისთვის.

"სერიოზულად ვემზადებით ჩვენ Pfizer-ის ადმინისტრირებისთვის. მოხდა გადამზადება, ე.წ. რეფრეშინგი იმ კლინიკების, სადაც Pfizer-ის ადმინისტრირება მიდიოდა. იმას ემატება კიდევ დაახლოებით 150-მდე ბრიგადა — 32 ბრიგადა აწარმოებდა Pfizer-ის ადმინისტრირებას, ეს ადის ივლისის ბოლომდე 150-მდე და შემდეგ, დაახლოებით, 300 ბრიგადამდე აგვისტოში.

ახლა მოსახლეობაზეა უკვე დამოკიდებული, თუ რამდენად აქტიური ვიქნებით", — განაცხადა ამირან გამყრელიძემ.

დღეს, 13 ივლისს კორონავირუსის 1862 ახალი შემთხვევა დადასტურდა, გარდაიცვალა 11 ადამიანი. რაც შეეხება დადებითობის მაჩვენებელს, 13 ივლისის მდგომარეობით, დადებითობის დღიური მაჩვენებელი არის 5.3%, ბოლო 7 დღის მანძილზე — 4,26%, ხოლო 14 დღის მანძილზე — 4%.

გაიგე მეტი: